ԵՐԵՎԱՆ, 31 հունվարի — Sputnik. ՀՀ կառավարության հունվարի 31-ի նիստում որոշում է կայացվել լուծարել «Շիրակի հանրային հեռուստառադիո» փակ բաժնետիրական ընկերությունը:
Հեռուստաընկերության լուծարման որոշման նախագիծը կառավարության հաստատմանը ներկայացրել է ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Բագրատ Բադալյանը։ Որպես հիմնավորում նախարարության կողմից նշվում է. «2016 թվականի հոկտեմբերի 26-ից Հայաստանի Հանրապետության տարածքում անջատվել է անալոգային հեռարձակումը և ամբողջությամբ անցում է կատարվել թվային հեռուստատեսային հեռարձակման: «Շիրակի հանրային հեռուստառադիո» փակ բաժնետիրական ընկերությունը լուծարելու ՀՀ կառավարության նախաձեռնությունը պայմանավորված է այն հանգամանքով, որ ընկերությունը առայսօր իրականացնում է անալոգային հեռարձակում և այդ պատճառով չի կարողանում ապահովել լայն լսարան, իսկ թվային հեռարձակում իրականացնելու համար առաջնահերթ կպահանջվի համապատասխան օրենսդրական կարգավորում և զգալի ֆինանսական ներդրումներ, ինչը այս պահին անիրատեսական է»:
ՀՀ կառավարության այս որոշման պատճառով Գյումրիում գործազուրկների մեծ բանակին կավելանա նաև Շիրակի աշխատակիցների թիվը՝ 60 մարդ: Ի դեպ, նրանցից շատերը երկար տարիներ են արդեն աշխատում այս հեռուստատեսությունում: Օպերատոր Տիգրան Գասաբյանը նշում է, որ վստահ չէ, որ հնարավոր կլինի աշխատանք գտնել Գյումրիում, ինչն էլ կստիպի տեղափոխվել Երևան։
«Աշխատակիցների մեծ մասը նոր աշխատանք գտնելու հույս չունի: Օրինակ` ձայնային օպերատորը Գյումրիում էլ ինչ գործ պետք է գտնի: Ես էլ ընդհանարապես հույս չունեմ նոր աշխատանք գտնելու, ստիպված հազարների նման գնալու եմ Երևան կամ բռնելու եմ արտագաղթի ճանապարհը: Շատերի համար սա ընտանիքի միակ եկամուտն էր»,-նշեց Տիգրան Գասաբյանը:
Հեռուստատեսությունը փակելու ասեկոսեներ հայտնվեցին դեռ 2 ամիս առաջ, սակայն տնօրեն Արթուր Ղանդիլյանը աշխատակիցներին ասել է, որ, որոշումը միայն հունվարի 31-ի կայացվել: Ի դեպ, Գյումրիում խոսում են, որ անալոգային հեռարձակման փաստը հեռուստատեսությունը փակելու միակ պատճառը չէ, ըստ որոշ տեղեկությունների խնդիրը նաև տնօրենի անձի ու տարածքի հետ է կապված:
Հավելենք, որ 90 -ականներին հիմնված հեռուստատեսությունը ստեղծվել է մարզում հանրային հեռուստատեսություն ունենալու կարևորությունից ելնելով: Մարզի շատ լրագրողների համար «Շիրակը» եղել է լավագույն դարբնոց:
