Հարկային օրենսգրքում կա համապատասխան հոդված, ըստ որի` բազմաբնակարան բնակելի շենքում անմիջապես կառուցապատողից բնակարան ձեռք բերելու կամ բնակելի թաղամասերի համալիրներում անմիջապես կառուցապատողներից անհատական բնակելի տուն ձեռք բերող քաղաքացիները կարող են ստանալ իրենց վճարած հիփոթեքային վարկի տոկոսների գումարները իրենց աշխատավարձի եկամտահարկի գումարը չգերազանցող չափով։
Այս գործընթացը սկսվել է 2015 թվականից և վերաբերում է 2014 թվականի նոյեմբերից հետո ստացված վարկերին։ Գործընթացի սկզբից մինչև այսօր շեշտակի աճ է գրանցվել ինչպես շահառուների քանակի, այնպես էլ վերադարձված գումարների մասով։
«Եթե 2015 թվականի ընթացքում վերադարձվել է մոտ 273 միլիոն դրամ, իսկ 2016 թվականին` 1 միլիարդ 350 մլն դրամ, ապա 2018 թվականի ընթացքում վերադարձը կազմել է 4 մլրդ 700 մլն»,– ասում է Միրզոյանը։
Նրա խոսքով` օրենքի ընձեռած հնարավորությունից օգտվելու համար կա երկու հիմնական հանգամանք` աշխատավարձի արդյունքում եկամտային հարկի առկայություն և կառուցապատողից գնում։
«Հիմնական կետերը սրանք են։ Իհարկե, փաստաթղթերի ցանկ կա, որը ներկայացվում է հարկային մարմին։ Առաջին անգամ այդ փաստաթղթերի ցանկը մի փոքր մեծ է, սակայն հետագայում ներկայացվում է միայն դիմում և վճարած տոկոսների մասին տեղեկություն»,– ասում է նա։
Ըստ Միրզոյանի` միաժամանակ նախատեսվում է, որ շահառուի համաձայնության դեպքում վճարված տոկոսների վերաբերյալ տեղեկությունը «ԱՔՌԱ» վարկային բյուրոն միանգամից տրամադրի հակային մարմնին և միայն դիմումի ներկայացման պահանջ լինի։
