ԵՐԵՎԱՆ, 28 հունվարի — Sputnik. 2008 թվականին Արցախի զինված ուժերը չէր ներգրավվել Հայաստանի ներքաղաքական կյանքին։ Այսօր լրագրողների հետ զրույցում այս մասին ասաց Հայաստանի զինված ուժերի գլխավոր շտաբի նախկին պետ և Արցախի պաշտպանության նախարարության նախկին ղեկավար Մովսես Հակոբյանը։
Նա նաև նշեց, որ տեղեկություն չունի 2008թ–ին Հայաստանում սահմանադրական կարգը տապալելու մեջ տարբեր անձանց մեղադրանքների վերաբերյալ։
«Իրավաբանությունից հեռու եմ, տեղյակ չեմ, ես Արցախի պաշտպանության նախարարն եմ եղել այդ ժամանակ, Արցախի զինված ուժերի ներգրավվածություն չի եղել», – ասաց նա։
Հակոբյանը չպատասխանեց նաև հարցին, թե օրինակա՞ն է համարում «№0038 հրամանը»։ Հարցին, թե ինքն ինչպե՞ս կգործեր, Մովսես Հակոբյանն ասաց` կարձագանքեր զինվորականի նման, որը պետք է կատարի ցանկացած հրաման։
Հիշեցնենք, որ մարտի 1-ի գործի շրջանակներում Միքայել Հարությունյանը ճանաչվել է մեղադրյալ և իր նկատմամբ հայտարարվել է հետախուզում: Պաշտպանության նախարար Միքայել Հարությունյանը 2008-ի փետրվարի 23-ին ստորագրել է հույժ գաղտնի թիվ 0038 ակնհայտ ապօրինի հրամանը «ՀՀ գերագույն գլխավոր հրամանատարի կողմից առաջադրված խնդիրների կատարման վերաբերյալ», որում խաղաղ ցուցարարները բնորոշվել են «ՀՀ նախագահական ընտրությունների արդյունքները չընդունող, իրավիճակը ապակայունացնող քաղաքական ուժեր», և «երկրի բնականոն զարգացումը» ապահովելու նպատակով ՀՀ զինված ուժերի ողջ անձնակազմը տեղափոխվել է զորանոցային վիճակի:
Քննչական մարմինը կարծում է, որ 2008թ–ի մարտի 1–ի երեկոյան զինված ուժերն ու ոստիկանական ստորաբաժանումները Երևանի կենտրոնական փողոցներում հատուկ գործողություններ են իրականացրել` զենքի, պայթուցիկ սարքերի և հատուկ միջոցների օգնությամբ ցրելով հավաքվածներին։ Դրա հետևանքով հարյուրավոր մարդիկ են վիրավորվել, 10–ը` մահացել։
