Ես կարծում եմ, որ «թավշյա հեղափոխությունից» հետո ԵԽԽՎ-ում մեր հիմնական առաջնահերթությունները չեն փոխվել: Այս մասին Sputnik Արմենիայի հետ զրույցում ասաց ԱԺ ԲՀԿ խմբակցության պատգամավոր Նաիրա Զոհրաբյանը, որը նախորդ՝ 6-րդ գումարման խորհրդարանում ԱԺ եվրոպական ինտեգրման հարցերի մշտական հանձնաժողովի նախագահն էր:
«Եվրոպայի խորհրդի խորհրդարանական վեհաժողովում մեր հիմնական առաջնահերթությունը լինելու է անել առավելագույնը Հայաստանում մարդու իրավունքները պաշտպանելու համար, Հայաստանում խոսքի ազատությունը պաշտպանելու համար և թույլ չտալը որևէ շեղում այն արժեքներից, որոնք ընկած են Եվրոպայի խորհրդի ստեղծման հիմքում»,-ասաց ԱԺ Մարդու իրավունքների պաշտպանության եւ հանրային հարցերի մշտական հանձնաժողովի նախագահը:
Նա նաև շեշտեց, որ չպետք է թույլ տալ, որ Ադրբեջանը Արցախյան հիմնախնդիրը, տարաբնույթ մանիպուլյացիաների միջոցով, հանի ԵԱՀԿ Մինսկի խմբի մանդատի ենթակայությունից:
