ԵՐԵՎԱՆ, 25 հունվարի — Sputnik. Դավոսում կայացած Փաշինյան–Ալիև հանդիպումից մեծ սպասումներ ակնկալել չարժե, և հազիվ թե 2019 թվականին արցախյան հարցով բանակցային գործընթացում որևէ շարժ կգրանցվի։ Այս մասին այսօր հրավիրված մամուլի ասուլիսին ասաց ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանը։
ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի նախապես չհայտարարված հանդիպումը տեղի ունեցավ հունվարի 22-ին։ Ինչպես հետո պատմեց Փաշինյանը, քննարկվել է բանակցային գործընթացի պատմությունը, կարգավորման համար պայմաններ ստեղծելու հնարավորությունը, առկա խոչընդոտները և այլն։ Միևնույն ժամանակ որևէ կոնկրետություն չի եղել, մանրամասներ չեն քննարկվել։
Հենց այդ պատճառով էլ Սաֆրաստյանը համոզված է, որ առաջընթացի համար որևէ նախադրյալ չկա։ Առանցքային խանգարող գործոնը` կարգավորման սեփական մոտեցումները վերանայելու Ադրբեջանի ցանկության բացակայությունն է։ Այն պայմաններում, երբ Ադրբեջանը որևէ փոխզիջման գնալ չի ցանկանում, անհնար է առարկայական բանակցություններ վարել։
«Բանակցային գործընթացն իրական կլինի միայն այն ժամանակ, երբ նրան իր անմիջական մասնակցությունը ցուցաբերի ԼՂՀ–ն։ Ցանկացած այլ ձևաչափ կենսունակ չէ։ Անհնար է լուծել Արցախի ճակատագիրն առանց նրա մասնակցության», – նշեց Սաֆրաստյանը։
Արևելագետի խոսքով` այս պայմաններում Փաշինյան–Ալիև հանդիպումները կարող են մեկ հիմնական խնդիր լուծել`հակամարտության գոտում համեմատած կայունության և անվտանգության ապահովում, դեէսկալացիայի որոշակի միջոցների մշակում և այլն։ Նոր սրացում տարածաշրջանում ոչ ոք չի ցանկանում։ Հետևաբար, Երևանն ու Բաքուն, այդ թվում նաև համաշխարհային հանրության խրախուսմամբ, պետք է պայմանավորվեն անվտանգության միջոցներն ամրապնդելու վերաբերյալ։
Պետք է նշել, որ Ալիևի հետ հանդիպումը ներքաղաքական ընդդիմադիրների կողմից Փաշինյանի հասցեին բավական խիստ քննադատություն առաջացրեց։ Նրանք մեղադրեցին նրան հանրությունից մանրամասները թաքցնելու մեջ։ Արևելագիտության ինստիտուտի տնօրենն այդ կապակցությամբ կարծում է, որ արցախյան թեմայի վերաբերյալ այդքան նուրբ վերաբերմունքը վկայում է հայ հասարակության հասունության մասին։ Քաղաքացիների նման զգայուն արձագանքն իշխանություններին կստիպի ավելի զգոն լինել։ Մյուս կողմից փորձագետը հակված չէ Փաշինյանի և Ադրբեջանի նախագահի հանդիպման մեջ դավադրության որևէ տարր տեսնել։ Նա կրկնեց այն միտքը, որ Արցախի թեմայով ցանկացած որոշում կընդունվի Ստեփանակերտի անմիջական մասնակցության պարագայում։
