ԵՐԵՎԱՆ, 23 հունվարի — Sputnik. Երևանի քննչական վարչության Էրեբունի և Նուբարաշեն վարչական շրջանների քննչական բաժնում որոշվել է «Լապտերիկ» մանկապարտեզի տնօրեն Գայանե Հովհաննիսյանի խափանման միջոցը սահմանել ստորագրություն բնակության վայրից չհեռանալու մասին:
Ինչպես տեղեկացնում է Shamshyan.com-ը առերեսման ժամանակ մանկապարտեզի տնօրեն Գ. Հովհաննիսյանն ընդունել է իրեն առաջադրված մեղադրանքը և քննչական կոմիտեի դեպոզիտային հաշվին է փոխանցել 20 մլն դրամ: Նա վերականգնել է պետությանը պատճառված վնասը:
Ինչպես արդեն տեղեկացրել էինք, մանկապարտեզի տնօրենը 13 մլն դրամ յուրացրել էր աշխատավարձերի չափով, մնացածը՝ սննդի:
Փաստի առթիվ հարուցվել է քրեական գործ՝ ՀՀ քր օր-ի 179 հոդվածի 3-րդ մասի 1-ին կետի և 308 հոդվածի 1-ին մասի հատկանիշներով:
Առերեսումներից հետո Գայանե Հովհաննիսյանի ինքնազգացողությունը վատացել է, նրան տեղափոխել են հիվանդանոց:
Հիշեցնենք, որ հունվարի 22–ին ՀՀ Քննչական կոմիտեն տեղեկություն հրապարակեց, համաձայն որի Երևանի «Լապտերիկ» մանկապարտեզի տնօրեն Գայանե Հովհաննիսյանը 2014թ. սկզբներից մինչև 2019թ. հունվարի 17-ն ընկած ժամանակահատվածում առերևույթ յուրացրել է իրեն վստահված, մանկապարտեզի երեխաների բաժին հանդիսացող, դեռևս չհաշվարկված արժեքի սննդի մի մասը, ինչպես նաև՝ յուրացման եղանակով առերևույթ հափշտակել մանկապարտեզում հրամանագրված, սակայն փաստացի չաշխատող անձանց անվամբ փոխանցված, առանձնապես խոշոր չափի` 13.357.941 ՀՀ դրամ գումարը։
