ԵՐԵՎԱՆ, 17 հունվարի — Sputnik. Խորհրդարանն այսօր 18։ 00-ին աշխատանքը չի ավարտի։ ԱԺ նիստը կշարունակվի ևս 1.5 ժամ։
Նման որոշում ԱԺ նախագահության առաջարկով քիչ առաջ կայացրեց նորընտիր խորհրդարանը։
Դահլիճում ներկա 129 պատգամավորներից որոշմանը կողմ քվեարկեց 72-ը։ Երկար աշխատելուն դեմ էր 2 պատգամավոր, 55-ը քվեարկությանը չմասնակցեց։
Այս պահին խորհրդարանում քննարկվում են Աժ մշտական հանձնաժողովների նախագահների թեկնածությունները։
Հարցի քննարկումը մեկնարկել է հունվարի 15-ին ու շարունակվում է արդեն 3 օր։
Հիշեցնենք, երկուշաբթի` հունվարի 14-ին մեկնարկած ԱԺ 7-րդ գումարման առաջին նստաշրջանում նորընտիր ԱԺ–ն ընտրել է ԱԺ նախագահին ու 3 փոխնախագահներին և առաջադրել ԱԺ մշտական 11 հանձնաժողովների նախագահների թեկնածուներին։
Հանձնաժողովների նախագահների պաշտոնները խորհրդարանական ուժերի միջև բաշխվել են ըստ նախապես ձեռք բերված պայմանավորվածության` 8-ը` «Իմ քայլից», 2-ը՝ «Բարգավաճ Հայաստանից», 1-ը՝ «Լուսավոր Հայաստանից»։
