ԵՐԵՎԱՆ, 17 հունվարի — Sputnik. Խորհրդարանական պաշտոնների բաժանումը կարող է տևել 105 օր։ Նման հաշվարկ այսօր ԱԺ նիստում ներկայացրեց ԱԺ գյուղատնտեսության և բնապահպանության հարցերի մշտական հանձնաժողովի նախագահի թեկնածու առաջադրված Վարազդատ Կարապետյանը։
«Եթե հաշվենք, որ ամեն մեկս յուրաքանչյուր հանձնաժողովի նախագահի թեկնածություն քննարկելիս ունենք հարց տալու իրավունք ու ելույթի իրավունք, ապա այս գործընթացը կարող է տևել 7 օր։ Եվ եթե հաշվի ենք առնում, որ մենք 15 մարդ ենք ընտրում այս 4 օրերի ընթացքում, 105 օր մենք տեսականորեն կարող ենք ծախսել հանձնաժողովների նախագահներին ու ԱԺ ղեկավարությանն ընտրելու վրա»,– իր հաշվարկը գործընկերներին ներկայացրեց Կարապետյանը` միաժամանակ հայտնելով իր դժգոհությունը, որ նորընտիր խորհրդարանն արդեն 4 օր աշխատում է, բայց քննարկման թեման ԱԺ պաշտոնների բաշխումից այն կողմ չի անցել։ Եվ սա այն պարագայում, որ, ինչպես իր ելույթում հիշեցրեց Վարազդատ Կարապետյանը, հանձնաժողովների նախագահների ընտրության հարցում խորհրդարանական ուժերը նախապես էին պայմանավորվել։
«Ինչ կարևոր է, թե հանձնաժողովի նախագահը` կոնկրետ ես, ինչ եմ մտածում ոռոգման համակարգի կամ համայնքների միավորման, խոշորացման գործընթացի մասին։ Ինչ կարևոր է իմ կարծիքը, եթե այսպես թե այնպես մենք բոլորս իրար հետ պետք է այդ հարցը լուծենք։ Ու այդ հանձնաժողովներում էլ են քվեարկություններով որոշումներն ընդունվում»,– ասաց Կարապետյանը` հավելելով, որ այս պահին ԱԺ—ը միայն մեկ խնդիր ունի` ընտրել հանձնաժողովների նախագահներին ու անցնել գործի։
«Մեր ընտրողները մեզանից արագություն են պահանջում, մենք պետք է արդեն անցնենք աշխատանքի»,– ասաց նա։
Հանձնաժողովի նախագահի թեկնածուի այս դիտարկումներն արժանացան գործընկերների ծափահարություններին, բայց այնուամենայնիվ 4 հարց տվող գտնվեց։
Հիշեցնենք, երկուշաբթի` հունվարի 14-ին մեկնարկած ԱԺ 7-րդ գումարման առաջին նստաշրջանում նորընտիր ԱԺ–ն ընտրել է ԱԺ նախագահին ու 3 փոխնախագահներին և առաջադրել ԱԺ մշտական 11 հանձնաժողովների նախագահների թեկնածուներին։ ԱԺ նախագահ Արարատ Միրզոյանը հունվարի 15-ի նիստում հայտարարեց, որ խորհրդարանական երեք ուժերի քննարկումների արդյունքում ձեռք բերված կոնսենսուսով ԱԺ մշտական հանձնաժողովներից 8-ը ղեկավարելու են «Իմ քայլը» խմբակցության, 2-ը՝ «Բարգավաճ Հայաստանի», 1-ը՝ «Լուսավոր Հայաստանի» ներկայացուցիչները:
Աշխատանքային հաջորդ 3 օրերի ընթացքում ԱԺ պատգամավորները հարցեր են ուղղում նրանց։
