ԵՐԵՎԱՆ, 17 հունվարի — Sputnik. Նախկին փոխվարչապետ Արմեն Գևորգյանն այսօր Վերաքննիչ դատարանում խնդրել է իր նկատմամբ հարուցված քրեական գործը քննել հանգիստ մթնոլորտում։ Այս մասին Վերաքննիչ դատարանի դռնփակ նիստից դուրս գալուց հետո լրագրողների հետ զրույցում հայտնեց Արմեն Գևորգյանը։
«Հայտարարությունով հանդես եկա, ներկայացրեցի այն բոլոր հիմքերը, որոնք վկայում են ներկայացված մեղադրանքների անհիմն լինելու մասին և, համենայն դեպս խնդրեցի, որ դատախազությունը, քննությունն իրականացնող մարմինն ու դատարանը ամեն ինչ անեն, որ գործը հանգիստ մթնոլորտում քննվի, որպեսզի վերջ ի վերջո արդարությունն ի հայտ գա ու բոլորն իմանան, թե ինձանից ինչ են ուզում»,– ասաց Գևորգյանը` ներկայացնելով դատական նիստի ընթացքը։
Քրեական գործի հետ կապված հարցերին Արմեն Գևորգյանը հրաժարվեց պատասխանել` ասելով. «Ես այնպիսի կարգավիճակում են, որ չեմ կարող որևէ տեղեկություն տալ գործի հետ կապված նյութերից»։
Իրեն առաջադրված մեղադրանքի, մասնավորապես` Սահմանադրական դատարանի դատավոր Վալերի Պողոսյանի նկատմամբ ճնշում գործադրելու մասին հարցին էլ այսպես արձագանքեց. «Մի հատ ինձ նայեք, ես ճնշում գործադրող մարդ կարա՞մ լինեմ»։
Վերաքննիչ դատական նիստն այսօր ընդհատվեց` առանց որոշման կայացման ։
Հիշեցնենք` Արմեն Գևորգյանին մեղադրանք էր առաջադրվել Մարտի 1-ի քրեական գործի քրեական գործի շրջանակում։ Ինչպես լրագրողներին հայտնել էր ՀՔԾ պետ Սասուն Խաչատրյանը, մեղադրանքը սահմանադրական կարգը տապալելու հոդվածով չէ, այլ արդարադատության իրականացումը խոչընդոտելու` ՀՀ քրեական օրենսգրքի 332 հոդվածի 3-րդ մասով:Մեղադրանքը հիմնված է` Wikileaks-ի այն հրապարակմանը, որի համաձայն Սահմանադրական դատարանի դատավոր Վալերի Պողոսյանի նկատմամբ ճնշում է եղել, նա բողոքել է, ասել է՝ Ռոբերտ Քոչարյանի աշխատակազմից իր վրա ճնշում կա, որ ինքը որոշում կայացնի Սերժ Սարգսյանին օգտին: Ըստ ՀՔԾ պետի` վիկիլիքսյան հրապարակումը հիմնավորվել է. Արմեն Գևորգյանը մեկ այլ պաշտոնյայի հետ միասին, փորձել է ճնշում գործադրել ՍԴ դատավոր Վալերի Պողոսյանի վրա։
Այս մեղադրանքով Արմեն Գևորգյանին 6 տարվա ազատազրկում է սպառնում։
Նրա նկատմամբ նախապես կիրառվել էր չհեռանալու մասին ստորագրություն:
2018 թ.-ին Արմեն Գևորգյանը ՀՀ փոխվարչապետն էր: Մինչ այդ տարբեր ժամանակահատվածներում նա աշխատել է որպես ՀՀ նախագահի աշխատակազմի ղեկավար, նախագահի առաջին օգնական, փոխվարչապետ, տարածքային կառավարման նախարար: 2007-2008 թթ.-ին, ինչպես նաև 2016թ.-ի հունիսից հոկտեմբեր եղել է Ազգային անվտանգության խորհրդի քարտուղար:
2018թ–ի դեկտեմբերի 14–ին Երևանի Նոր Նորք համայնքի ընդհանուր իրավասության դատարանը մերժեց ՀՀ նախկին փոխվարչապետ, անվտանգության խորհրդի քարտուղար Ամեն Գևորգյանին կալանավորելու մասին նախաքննական մարմնի միջնորդությունը։ Նախաքննական մարմինը որոշումը բողոքարկել է Վերաքննիչ դատարանում։
Արմեն Գևորգյանն իրենց առաջադրված մեղադրանքը չի ընդունում։
