ԵՐԵՎԱՆ, 16 հունվարի — Sputnik. Արցախի հարցերով Հայաստանի և Ադրբեջանի առաջնորդների հանդիպման կազմակերպման հնարավորությունը քննարկվել է երկու երկրների արտգործնախարարներ Զոհրաբ Մնացականյանի և Էլմար Մամեդյարովի բանակցությունների ժամանակ: Այս մասին գրված է կազմակերպության կայքում տեղադրված հայտարարության մեջ։
«Նախարարներն ու համանախագահները ուսումնասիրել են հետևյալ քայլերը` Ադրբեջանի և Հայաստանի առաջնորդների միջև հավանական գագաթնաժողովի կազմակերպման ճանապարհին, բանակցությունների դինամիկային ուժեղ խթան հաղորդելու համար: Համանախագահները մտադիր են առաջիկայում հանդիպել երկու երկրների առաջնորդների հետ», – մասնավորապես ասված է հայտարարության մեջ։
Նշվում է, որ համանախագահներն ընդգծել են տարածաշրջանի տնտեսական ներուժի իրականացմանն ուղղված փոխշահավետ հավանական նախաձեռնությունների կարևորությունը։
«Նախարարները քննարկել են հարցերի լայն շրջանակ, կապված արցախյան հակամարտության կարգավորման հետ, և պայմանավորվածություն ձեռք բերել բնակչությանը խաղաղության նախապատրաստելու համար կոնկրետ միջոցներ ձեռնարկելու անհրաժեշտության մասին», – ընդգծված է հայտարարության մեջ։
Հիշեցնենք, հանդիպումը կայացել է Փարիզում այսօր՝ հունվարի 16-ին, ԵԱՀԿ ՄԽ համանախագահների մասնակցությամբ։
