ԵՐԵՎԱՆ, 16 հունվարի — Sputnik. Հունվարի 1-ից ՊԵԿ-ը ներմուծել է ավտոմեքենաների մաքսային արժեքի հաշվառման նոր գործիք։
Այսօր լրագրողների հետ հանդիպմանը, անդրադառնալով ավտոմեքենաների ներկրման կարգի շուրջ առկա տարաբնույթ մեկնաբանություններին, ասաց ՀՀ ՊԵԿ նախագահ Դավիթ Անանյանը։
«Անձինք, ովքեր մեքենա են ձեռքբերել դրսում և ունեն արժանահավատ ինվոյս՝ ձեռք բերման փաստաթուղթ, որևէ խնդիր չունեն, այդ փաստաթղթի հիման վրա կատարվելու է մաքսային ձևակերպում»,– հայտարարեց ՊԵԿ նախագահը։
Նրա խոսքով, ՀՀ քաղաքացիները, մաքսային ձևակերպման համար բարենպաստ արժեք ունենալու համար, զանազան կազմակերպությունների միջոցով փորձում էին ձեռք բերել ոչ արժանահավատ ինվոյսներ: Դրանից խուսափելու համար ՊԵԿ կայքում ներդրվեց նոր գործիք, որով քաղաքացիները կարող են ավտոմեքենան ներկրելուց առաջ ներմուծել դրա տվյալներն ու ստանալ այն արժեքը, որով ինվոյսի բացակայության պայմաններում Մաքսային ծառայությունն իրականացնելու է մաքսային ձևակերպումը:
ՊԵԿ նախագահը նշեց, որ անձը ներկայացնում է ավտոմեքենայի ձեռք բերման բոլոր փաստաթղթերը, ինվոյսը համեմատվում է հաշվիչի արժեքի հետ և եթե որևէ տարբերություն չկա մաքսային ձևակերպումը կատարվում է:
«Եթե ինվոյսն ավելի ցածր է քան հաշվիչի տվյալը, ապա այն ներկայացվում է համապատասխան վարչություն զննման համար: Եթե առերևույթ բան չի հայտնաբերվում, այդ դեպքում ևս մաքսային ձևակերպում կատարվում է ինվոյսի հիման վրա»,– ասաց Անանյանը։
Հակառակ դեպքում, եթե պարզվում է , որ խնդիրներ կան, կիրառվում են պատասխանատվության միջոցներ։
