ԵՐԵՎԱՆ, 14 հունվարի — Sputnik. Լիդիա Խաչատուրյանը` Միխայիլ Խաչատուրյանի մայրը, որոշել է դուրս գրել բնակարանից թոռներից մեկին։ Խոսքը ավագ դստեր` Կրիստինայի մասին է։ Այս մասին հայտնում է «Մոսկովսկի կոմսոմոլեց» պարբերականը։
Նշվում է, որ կինը հայց է ներկայացրել դատարան։ Ավելի վաղ, դատարանի որոշմամբ, նա պաշտոնապես բնակարանից դուրս էր գրել Միխայիլի նախկին կնոջը` Աուրելիային ու նրանց որդի Սերգեին։
Հիմա նա ցանկանում է իր երկու սենյականոց բնակարանից դուրս գրելու Կրիստինա Խաչատրյանին։
Միխայիլի քույրը` Նաիրան, նշել է, որ մայրը հաճախ ստիպված էր լինում լքել բնակարանը, քանի որ աղջիկները ծաղրում էին տատին, երբ նրանց հայրը Երուսաղեմում էր։ Լիդիա Խաչատուրյանը չէր ուզում բողոքել որդուն` զերծ պահելով նրան ավելորդ ապրումներից։
Նաիրան հայտնել է նաև, որ այդ բնակարանում գրանցված են Միխայիլի բոլոր չորս քույրերը, նրա զարմիկ Արսենն ու բնակարանի սեփականատեր Լիդիա Խաչատուրյանը։
«Մայրս ասում է, որ նա հավերժ չէ, ու քանի նա դեռ ողջ է, ուզում է իր բնակարանից դուրս հանել իր որդուն սպանողին», – ասել է Նաիրան։
Հայցադիմումում Խաչատուրյանը նշել է, որ Կրիստինան ոչ մի կոպեկ չէր վճարում կոմունալ ծախսերից ու չէր հավաքում բնակարանը։
Խաչատուրյանի բարեկամները պնդում են, որ երբ հայրը դեռ ողջ էր, Կրիստինայի պարտականությունների մեջ էր մտնում կոմունալ վարձի վճարումը (մեկ այլ բնակարանի վարձի գումարը նրա քարտին էր գալիս), սակայն Միխայիլ Խաչատուրյանի սպանությունից հետո պարզվել է, որ կոմունալ ծառայությունների համար 70 հազար ռուբլի պարտք է գոյացել։
Հիշեցնենք` Մոսկվայի Օստանկինյան դատարանը օգոստոսի 2-ին կալանավորել էր երեք քույրերին։ Սեպտեմբեր 27-ին Մոսկվայի Բասմանյան դատարանը հավանություն է տվել Խաչատուրյան քույրերի կալանքը «որոշակի գործողությունների արգելքով» փոխարինելու միջնորդությանը։ Նրանք տեղավորվել են առանձին բնակարաններում։ Այժմ մեղադրյալներին արգելվում է գիշերային ժամերին լքել բնակության վայրը և որևէ մեկի հետ շփվել առանց Պատժի կատարման դաշնային ծառայությանը տեղեկացնելու։
Բացի Պատժի կատարման դաշնային ծառայության աշխատակիցներից և աղջիկների պաշտպաններից, մյուսների հետ աղջիկները կշփվեն միայն քննիչի թույլտվությամբ։ Բացառություն է արվել Մարիայի համար, նրան թույլ են տվել շփվել մոր հետ, քանի որ մայրը նրա օրինական ներկայացուցիչն է։
