ԵՐԵՎԱՆ, 14 հունվարի — Sputnik. Վաղը, Ազգային ժողովի ընդդիմադիր փոխխոսնակի ընտրության ժամանակ, «Լուսավոր Հայաստան» խմբակցությունը խորհրդարանական մեծամասնություն «Իմ քայլը» խմբակցությանն առաջարկում է քվեարկել իրենց առաջադրած թեկնածուի օգտին:
Այս մասին այսօր ԱԺ-ում լրագրողների հետ զրույցի ժամանակ ասաց «Լուսավոր Հայաստանի ղեկավար Էդմոն Մարուքյանը:
«Մեզ ասում են` ինչու՞ չեք ԲՀԿ-ի հետ բանակցում, որ մի թեկնածու լինի, մենք էլ հեշտ քվեարկենք: Այսինքն`իշխանությունը փորձում է իր բեռը բարդել մեզ վրա»,- ասաց Մարուքյանը:
Նրա խոսքով իրենք և ԲՀԿ-ն արդեն որոշել են`յուրաքանչյուրն առաջադրում է իր թեկնածուին, հիմա իշխանությունը պետք է որոշի, թե ում է ձայն տալու:
«Ես դրա համար եմ ասում, որ իմ կռիվը ԲՀԿ-ի հետ չէ: Անտրամաբանական է նրանցից հայցել ձայներ, նրանք թեկնածու ունեն: Մեր բոլոր շեշտադրումները, գնահատականները, հորդորները ուղղված են «Իմ քայլը» դաշինքին»,- ասաց Մարությանը:
Իսկ տեսակետը, թե ԲՀԿ-ն ստացած ձայներով այս խորհրդարանի երկրորդ ուժն է, ուստի նրան է պատկանում ընդդիմության ներկայացուցիչ փոխնախագահի պաշտոնը, Մարուքյանը չի ընդունում` հակադարձելով. «Կարող է ՀՀԿ-ն լիներ երկրորդ ուժը, պիտի ընտրեի՞ն»:
Նշենք, որ ԱԺ նախագահն, ըստ կանոնակարգի, ունի 3 տեղակալ, որից 2-ը քաղաքական մեծամասնության` «Իմ քայլը» խմբակցության անդամներ են: Խմբակցությունն այդ պաշտոնում առաջադրել է Լենա Նազարյանի ու Ալեն Սիմոնյանի թեկնածությունները:
Հիշեցնենք, որ այս հարցի կապակցությամբ ՀՀ վարչապետ Նիկոլ Փաշինյանը ավելի վաղ հայտարարել էր, որ ճիշտ է, որ այդ պաշտոնը ստանա ընտրողների ավելի շատ ձայներ ստացած քաղաքական ուժը, տվյալ դեպքում՝ ԲՀԿ-ն: ԱԺ Կանոնակարգ օրենքը, սակայն, նման կարգավորում չի նախատեսում և ընտրությունը թողնում է խորհրդարանի վրա:
ԱԺ փոխնախագահների ընտրությունը խորհրդարանում կանցկացվի վաղը: Իսկ այսօր 7-րդ գումարման խորհրդարանն իր առաջին աշխատանքային օրը հասցրեց ընտրել միայն ԱԺ նախագահին:
