ԵՐԵՎԱՆ, 14 հունվարի — Sputnik. Մինչ ընտրությունը ԱԺ նախագահի թեկնածու Արարատ Միրզոյանը խոստացավ վերացնել խորհրդարանում նախկինում առկա անարդարությունն ու անհավասարությունը։ Այս մասին նա ասաց այսօր, լրագրողների հետ զրույցում:
«Որոշ պատգամավորներ մեքենաներով էին մտնում ԱԺ բակ, որոշ պատգամավորներ՝ ոչ, որոշ պատգամավորներ երեք սենյականոց աշխատանքային սենյակներ ունեին, որոշ պատգամավորներ՝ ոչ: Ես մեր խմբակցության ներսում արդեն առիթ ունեցել եմ այս մասին խոսելու, ասել եմ, որ ես ստանդարտիզացիայի կողմնակից եմ, և մենք գուցե շուտով ունենանք նաև մի ձեռնարկ, որտեղ թղթին գրված կլինի, որ, օրինակ, ԱԺ պատգամավորը պետք է ունենա, ասենք՝ 8 քառ. մետր սենյակ, ֆրակցիայի ղեկավարը պե՞տք է ունենա հանգստի սենյակ, թե ոչ: Եթե մեկին հասնում է, մյուսները ևս պետք է ունենան»,- ասաց Միրզոյանը:
Նույն համահավասար վերաբերմունքը, նրա խոսքով, պետք է կիրառվի նաև պատգամավորների բացակայությունների նկատմամբ:
