ԵՐԵՎԱՆ, 13 հունվարի –Sputnik, Լաուրա Սարգսյան. Հայերն ու ադրբեջանցիները կարողանում են սատարել միմյանց և նորմալ շփվել։ Համենայնդեպս, եթե խոսքը գեղեցկության մրցույթների մասին է։ Դրանում համոզվել է հայաստանցի մոդել Էդգար Կարապետյանը։
Էդգարը 23 տարեկան է, մոդելային բիզնեսում ներգրավված է 19 տարեկանից։ Զուգահեռաբար ընկերություններից մեկում գանձապահ է աշխատում։ Դեկտեմբերին նրան բախտ վիճակվեց առաջին անգամ մասնակցելու Դելիում կայանալիք Mister Model Worldwide 2018 միջազգային մրցույթին։ Գլխավոր մրցանակը նա չստացավ, սակայն Հայաստան վերադարձավ երկու անվանակարգերում` «Լավագույն տաղանդ» և «Լավագույն ոճ» տարած հաղթանակով։
«Ինձ վրա մեծ պատասխանատվություն էր դրված, անհանգստանում էի, բայց կարողացա հաղթահարել։ Մրցույթը բացելու պատիվն ինձ էր տրված, այսինքն` Հայաստանին։ Հատկապես հետաքրքրական էր Ադրբեջանի մասնակցի հետ ծանոթությունը», –Sputnik Արմենիային պատմեց Կարապետյանը։
Ծանոթանալիս տղաները միմյանց ձեռք սեղմեցին, Էդգարը ժպտաց։ Մրցույթներից մեկի ժամանակ այնպես ստացվեց, որ ադրբեջանցի մասնակիցը ինչ–որ սխալի պատճառով, չէր կարողանում հասկանալ, թե որ համարի ներքո պետք է բեմ դուրս գա։ Օգնության հասավ Էդգարը։
Մրցույթը 7 օր տևեց, այդ օրերի ընթացքում Էդգարին և աշխարհի տարբեր երկրներից ժամանած ևս 25 մասնակցի շատ դժվար էր. առավոտը սկսվում էր ժամը 4-ից։ Ամեն օր ֆոտոսեսիաներ, հարցազրույցներ, մրցույթի նախապատրաստական աշխատանքներ, փորձեր. այդ ամենը շատ էր հոգնեցնում։
Հայ երիտասարդը մրցույթի ժյուրիին գերեց իր տաղանդով և ոճով։ Ցուցադրություններից մեկի համար նա ընտրել էր հայ թագավորների տարազը։
«Լավագույն տաղանդ» անվանակարգում նրան հաղթանակ բերեց վրձնի և ներկերի շնորհիվ ստեղծած «սառցե հեքիաթը»։ Բայց ամենադժվարն Էդգարի համար եղել է հարցազրույցի փուլը, քանի որ լեզվային խոչընդոտներ կային։
«Նրանք շատ համեղ խոհանոց ունեն, դժվար կլիներ չուտելը։ Բախտս բերեց, ես ինձ չէի սահմանափակում, 185 սմ հասակ և 65 կգ քաշ ունենալու պարագայում դրա անհրաժեշտությունը չկար», – ասաց Էդգարը։
Երիտասարդը մտադիր է իր ներդրումն ունենալ մի ոլորտում, որը Հայաստանում դեռ նոր է զարգանում։
Sputnik Արմենիայի թղթակցի հետ զրույցում մրցույթի ազգային տնօրեն Յանա Գրիգորյանն իր հերթին նշեց, որ Հայաստանի մասնակցությունը նման մրցույթներում չափազանց կարևոր է։ Շատերը նույնիսկ չգիտեն մեր երկրի մասին, իսկ նման միջոցառումները օգնում են հանրահռչակել այն։
Նա նշեց, որ Էդգարը մրցույթներին մասնակցելու բազմաթիվ հրավերներ է ստացել։ Հնարավոր է, որ արդեն մի քանի ամիս անց նա կրկին մրցութային մեծ բեմ դուր գա։
