ԵՐԵՎԱՆ, 11 հունվարի — Sputnik. Մանվել Գրիգորյանին կրկին կալանավորելու վերաբերյալ Դատախազության միջնորդության գործի քննության հետաձգումից հետո Վերաքննիչ դատարանի առջև բողոքի ցույց իրականացնողները փակել էին փաստաբանի մեքենայի ճանապարհը՝ թույլ չտալով նրան հեռանալ տարածքից:
Նրանք վանկարկում էին «տուշոնկի փաստաբան» և հարցնում, թե ինչքան գումարի դիմաց է որոշել Մանվել Գրիգորյանի շահերը պաշտպանել:
Ցուցարարներին հատկապես վրդովեցրել էր փաստաբան Արսեն Մկրտչյանի՝ ցուցարարներին թափթփուկ անվանելը:
Sputnik Արմենիայի հետ զրույցում Մանվել Գրիգորյանի փաստաբան Արսեն Մկրտչյանը շեշտեց, որ ինքը նման հայտարարություն չի արել, և իր բառապաշարում ընդհանրապես նման բառ չկա:
Փաստաբանին հաջողվեց տարածքից հեռանալ ոստիկանների օգնությամբ:
Ի դեպ ավելի ուշ փաստաբանը նկար է տարածել, ըստ որի հասկանալի է դառնում, որ նրա մեքենայի վրա ինչ-որ ներկանման նյութ են լցրել:
![Ցուցարարները չէին թողնում Մանվել Գրիգորյանի փաստաբանին հեռանալ. տեսանյութեր Ցուցարարները չէին թողնում Մանվել Գրիգորյանի փաստաբանին հեռանալ. տեսանյութեր - Sputnik Արմենիա](https://cdn.am.sputniknews.ru/img/1669/84/16698456_0:0:960:960_600x0_80_0_0_ccfc6ee0b9f5f6154052aac7cf3e2cb7.jpg)
Մեքենայի վրա ինչ-որ նյութ լցնելու պահը նկատելի է տեսանյութի 00:50 վայրկյանին:
![Ցուցարարները չէին թողնում Մանվել Գրիգորյանի փաստաբանին հեռանալ. տեսանյութեր Ցուցարարները չէին թողնում Մանվել Գրիգորյանի փաստաբանին հեռանալ. տեսանյութեր - Sputnik Արմենիա](https://cdn.am.sputniknews.ru/img/1669/91/16699134_0:0:1470:827_600x0_80_0_0_75fa94e30b0cea8e1f3eb675ac117c39.jpg)
Հիշեցնենք, որ ՀՀ վերաքննիչ դատարանը սկսել է Մանվել Գրիգորյանի խափանման միջոցը գրավով փոխարինելու որոշման դեմ դատախազության ներկայացրած բողոքի քննությունը: Ըստ այդմ՝ դատարանը որոշում կկայացնի՝ Մանվել Գրիգորյանին վերադարձնել կալանավայր, թե ոչ: Նիստին զուգահեռ ընթանում էր բողոքի ակցիա: