ԵՐԵՎԱՆ, 9 հունվարի — Sputnik. ՀՀ երկրորդ նախագահ Ռոբերտ Քոչարյանի հարազատներին չեն թույլատրել տեսակցել նրան Ամանորին։ Այսօր` Ռոբերտ Քոչարյանի կալանքի հարցով դատական նիստից առաջ, լրագրողների հետ զրույցում այս մասին ասաց Քոչարյանի փաստաբան Արամ Օրբելյանը։
«Առնվազն մինչև երեկ` հունվարի 8-ն այդպես էր։ Խնդիրն ընտանիքի անդամների հետ կապված չէ։ Ընդհանրապես կա տեսակցության արգելք»,– ասաց Օրբելյանը։
ՀՀ երկրորդ նախագահին չեն հասել նաև հարազատների փոխանցած հանձնուքները։
Փաստաբանը դա բացատրեց նրանով, որ հանձնուքների փոխանցումը կալանավայրում կազմակերպվել է միայն 2 օր` դեկտեմբերի 29-ին և հունվարի 5-ին։
«Հանձնուքները հնարավոր է եղել հանձնել միայն այդ երկու օրերին։ Դա չի վերաբերում միայն պարոն Քոչարյանին, այլ ընդհանրապես բոլոր այն անձանց, որոնք պահվում են «Կենտրոն» ՔԿՀ–ում»,–ասաց նա։
Քոչարյանի փաստաբաններն այս հարցով դիմել են մարդու իրավունքների պաշտպանին։
Լրագրողները նաև հետաքրքրվեցին` ինչ պայմաններում է պահվում Քոչարյանը կալանավայրում և ունի սպորտով զբաղվելու հնարավորություն։
«Շարունակում է սպորտով զբաղվել։ Օրվա ընթացքում շուրջ 1 ժամ սպորտդահլիճում և սենյակի ներսում յոգայով զբաղվելու հնարավորություն ունի, քանի որ սենյակի չափերը թույլ չեն տալիս այլ սպորտաձևով զբաղվել»,– ասաց Օրբելյանը։
Իսկ Քոչարյանի սենյակը, նրա տեղեկություններով, ամենասովորական մեկտեղանոց խուց է։
Փաստաբանը վերահաստատեց նաև` Քոչարյանը դատական այսօրվա նիստին չի մասնակցի, դրա անհրաժեշտությունը չկա։
Հիշեցնենք` ՀՀ 2–րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
Քննչական մարմինը Քոչարյանի նկատմամբ խափանման միջոց էր ընտրել կալանավորումը։
Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել էր անձեռնմխելի և ազատել կալանքից:
Ավելի ուշ քրեական գործի նախաքննությունը վարող ՀՔԾ քննիչը որոշում էր կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին:
Իսկ Վճռաբեկ դատարանը փաստաբանների բողոքի հիման վրա որոշում էր կայացրել գործն ուղարկել լրացուցիչ քննության, որի ավարտին վերաքննիչ դատարանը Քոչարյանի նկատմամբ կիրառված կալանքը ուժի մեջ թողնելու որոշում կայացրեց։
Այդ որոշման հիման վրա դեկտեմբերի 7-ին Ռոբերտ Քոչարյանը դարձյալ կալանավորվեց։ Այս որոշման նկատմամբ դեկտեմբերին ներկայացված վերաքննիչ բողոքի քննությունն Ամանորից առաջ հետաձգվեց։ Առաջին ատյանի դատարանի նիստը նշանակվեց հունվարի 9-ին։
