ԵՐԵՎԱՆ, 9 հունվարի — Sputnik. Forbes–ի վարկածով աշխարհի ամենահարուստ մարդը (փորձագետները նրա կարողությունը 139,6 մլրդ դոլար են գնահատում)` Amazon–ի հիմնադիր Ջեֆ Բեզոսը, հայտարարել է, որ բաժանվում է կնոջից` Մակենզի Բեզոսից, որի հետ ամուսնացել է 25 տարի առաջ` 1993 թվականին։ Նրանց ամուսնալուծության պայմանների մասին դեռ ոչինչ հայտնի չէ, իսկ տխուր իրադարձության մասին նրանք հայտնել են Twitter–ի միջոցով։
Համատեղ հայտարարության մեջ նշված է, որ նրանք «գործընկերներ ու ընկերներ» կմնան։
— Jeff Bezos (@JeffBezos) 9 января 2019 г.
Ամուսնալուծությունից առաջ զույգը փորձնական բաժանվել է, այդ մասին հայտնի է եղել միայն նրանց ընկերներին և մտերիմներին։
«Մենք անչափ երջանիկ ենք, որ գտել ենք միմյանց և խորապես երախտապարտ ենք միասին ապրած յուրաքանչյուր տարվա համար։ Եթե իմանայինք, որ բաժանվելու ենք 25 տարի անց, մենք, միևնույն է, կամուսնանայինք։ Որպես ամուսիններ` հիանալի կյանք ենք ունեցել, իսկ առջևում մեզ հիանալի ապագա է սպասում` որպես ծնողներ, ընկերներ և տարբեր նախագծերի գործընկերներ... Ամեն դեպքում մենք ընտանիք և սրտակից բարեկամներ կմնանք»։
1980-ականներին Ջեֆ Բեզոսն ու Մակենզի Թաթլը նույն ժամանակահատվածում սովորել են Փրինստոնի համալսարանում, բայց ծանոթացել են միայն 1992 թվականին, երբ երկուսն էլ արդեն ապրում էին Նյու Յորքում և աշխատում էին Ուոլ սթրիթում գտնվող D.E. Shaw ներդրումային հիմնադրամում։ 1993 թվականին ամուսնացել են, իսկ 1994 թվականին տեղափոխվել են Սիեթլ, որտեղ Ջեֆը հիմնադրել է Amazon.com ընկերությունը։
Նրանք 4 երեխա ունեն` 3 որդի և մեկ որդեգրած դուստր։
Մակենզի Բեզոսը գլխավորում է Bystander Revolution հիմնադրամը, որը զբաղվում է դպրոցներում թշնամանք սերմանելու դեմ պայքարով։ Նա հայտնի է նաև որպես գրող, 2006 թվականին Ամերիկյան գրական մրցանակի է արժանացել «The Testing of Luther Albright» գրքի համար։
