ԵՐԵՎԱՆ, 8 հունվարի — Sputnik. Այսօր մեկնարկեց 2019 թվականի առաջին աշխատանքային շաբաթը, ուր մենք մուտք ենք գործում օրեցօր ավելացող մտահոգություններով։ Facebook սոցիալական ցանցի իր էջում գրել է ԱԺ փոխնախագահ, ՀՀԿ խոսնակ Էդուարդ Շարմազանովը` թվարկելով իր մտահոգությունները։
«Առաջին անհրաժեշտության բազմաթիվ ապրանքների թանկացում, 2018 թվականի բյուջեի թերի կատարում կամ չկատարում, առանց իրական ընդդիմության նոր խորհրդարան, ՀԱՊԿ-ում ՀՀ-ի դիրքերի թուլացում ու գլխավոր քարտուղարի պաշտոնի կորուստ, Փաշինյանի խոստացած հայ-ռուսական փայլուն հարաբերությունների փոխարեն գազի թանկացում»,– գրել է նա։
Շարմազանովն ավելացրել է, որ շարքն իրականում ավելի երկար է, բայց կա նաև մեկ լավ լուր`վարչապետի պաշտոնակատարը այս ամենը պարտություն չի համարում։
«Փաստորեն, մեզ այսպիսի՞ հաղթանակներ և տնտեսական հեղափոխություն է սպասում»,– եզրափակել է նա։
Ի դեպ, այսօր 2019թ–ի առաջին աշխատանքային օրվա մեկնարկի կապակցությամբ շնորհավորանք էր հղել նաև վարչապետի պաշտոնակատար Նիկոլ Փաշինյանը։
