ԵՐԵՎԱՆ, 6 հունվարի – Sputnik. Կյանքից հեռացել է «Դրոյի գործով» դատապարտված Արմենակ Մնջոյանը: Այս մասին նշված է Free Arsen Arzrouni ֆեյսբուքյան էջում:
«Ցավակցում ենք մեզ բոլորիս, կորուստը ծանր է, վիշտը՝ անդարմանելի: Աստված հոգիդ լուսավորի, եղբայր: Արմենակ Մնջոյանը 54 տարեկան էր», - նշված է հաղորդագրության մեջ:
Նշենք, որ Մնջոյանի վիճակը վատացել էր հունվարի 3-ի առավոտյան՝ Նուբարաշեն ՔԿՀ-ում: Նա Էրեբունի բժշկական կենտրոն էր տեղափոխվել սրտամկանի կաթվածով և թոքի այտուցով։
ՀՅԴ անդամ Արմենակ Մնջոյանը ձերբակալվել էր 1995 թվականին, «Դրոյի» գործով և 1996 թվականին դատապարտվել մահապատժի։ 2003 թվականի ապրիլի 18-ին ՀՀ ԱԺ ընդունած «ՀՀ քրեական օրենսգիրքը գործողության մեջ դնելու մասին» օրենքով մահապատիժը Հայաստանում վերացվել է ու մահապատժի դատապարտվածների պատժաչափը մեխանիկորեն վերածվել է ցմահ ազատազրկման:
2003 թվականի օգոստոսի 1-ին Հայաստանի Հանրապետության Նախագահի թիվ 103-Ա հրամանագրով Արմենակ Մնջոյանին շնորհվել է ներում: Նույն հրամանագրով Հանրապետության Նախագահը Մնջոյանի նկատմամբ նշանակել է պատիժ` ցմահ ազատազրկման ձևով:
«Դրոյի գործը» բացահայտվել է 1994թ. դեկտեմբերին։ 1994-ի դեկտեմբերին Լևոն Տեր-Պետրոսյանն անձամբ հանդես եկավ հեռուստատեսությամբ` խոսելով «Դրոյի» ահաբեկչական կառույցի բացահայտման մասին, որից անմիջապես հետո կասեցվեց ՀՅԴ-ի գործունեությունը։ Մեկ տարի անց բացահայտվեց նաև ՀՅԴ–ի հետ կապված «31-ի գործը»։
Գործի նյութերի համաձայն` ՀՅԴ-ն, դժգոհ լինելով Տեր-Պետրոսյանի իշխանությունից, վերջինիս նկատմամբ ահաբեկչական գործողություն էր նախապատրաստել, սակայն չհասցրեց այն իրականացնել, քանզի ՀՅԴ անդամ Վահան Հովհաննիսյանն իր ղեկավարած զինված խմբով, ձերբակալվեց և վնասազերծվեց նախագահական ուղևորվելիս:
Այս գործերի բացահայտմամբ զբաղվել են ՀՀ ազգային անվտանգության այն ժամանակվա ղեկավարներ Կառլոս Պետրոսյանը, Դավիթ Շահնազարյանը, ներքին գործերի նախարար Սերժ Սարգսյանը:
