ԵՐԵՎԱՆ, 4 հունվարի — Sputnik. «Նուբարաշեն» քրեակատարողական հիմնարկում պատիժ կրող ցմահ դատապարտյալ Արմենակ Մնջոյանի առողջական վիճակի, նրա բուժօգնությանն առնչվող հարցերը Մարդու իրավունքների պաշտպանի աշխատակազմը վաղ առավոտյան քննարկել է Արդարադատության նախարարության քրեակատարողական վարչության և բժիշկների հետ։ Հայտնում է ՀՀ Մարդու իրավունքների պաշտպանի ֆեյսբուքյան պաշտոնական էջը` անդրադառնալով Մնջոյանի առողջական վիճակի մասին տարածված լուրերին։
«Պաշտպանի աշխատակազմը ուշադրության ներքո կպահի ինչպես այս, այնպես էլ նրա մյուս իրավունքների հետ կապված հարցերը»,– նշված է հաղորդագրության մեջ։
Մինչ այդ այսօր առավոտյան, Արմենակ Մնջոյանի դուստրը լրատվամիջոցներին հայտնել էր, որ իր հոր առողջական վիճակը կտրուկ վատացել է, նրան տեղափոխել են դատապարտյալների հիվանդանոց։
Հիշեցնենք` ՀՅԴ անդամ Արմենակ Մնջոյանը ձերբակալվել էր 1995 թվականին, «Դրոյի» գործով և 1996 թվականին դատապարտվել մահապատժի։ 2003 թվականի ապրիլի 18-ին ՀՀ ԱԺ ընդունած «ՀՀ քրեական օրենսգիրքը գործողության մեջ դնելու մասին» օրենքով մահապատիժը Հայաստանում վերացվել է ու մահապատժի դատապարտվածների պատժաչափը մեխանիկորեն վերածվել է ցմահ ազատազրկման:
2003 թվականի օգոստոսի 1-ին Հայաստանի Հանրապետության Նախագահի թիվ 103-Ա հրամանագրով Արմենակ Մնջոյանին շնորհվել է ներում: Նույն հրամանագրով Հանրապետության Նախագահը Մնջոյանի նկատմամբ նշանակել է պատիժ` ցմահ ազատազրկման ձևով:
«Դրոյի գործը» բացահայտվել է 1994թ. դեկտեմբերին։ 1994-ի դեկտեմբերին Լևոն Տեր-Պետրոսյանն անձամբ հանդես եկավ հեռուստատեսությամբ` խոսելով «Դրոյի» ահաբեկչական կառույցի բացահայտման մասին, որից անմիջապես հետո կասեցվեց ՀՅԴ-ի գործունեությունը։ Մեկ տարի անց բացահայտվեց նաև ՀՅԴ–ի հետ կապված «31-ի գործը»։
Գործի նյութերի համաձայն, ՀՅԴ-ն, դժգոհ լինելով Տեր-Պետրոսյանի իշխանությունից, վերջինիս նկատմամբ ահաբեկչական գործողություն էր նախապատրաստել, սակայն չհասցրեց այն իրականացնել, քանզի ՀՅԴ անդամ Վահան Հովհաննիսյանը` իր ղեկավարած զինված խմբով, ձերբակալվեց և վնասազերծվեց նախագահական ուղևորվելիս:
Այս գործերի բացահայտմամբ զբաղվել են ՀՀ ազգային անվտանգության այն ժամանակվա ղեկավարներ Կառլոս Պետրոսյանը, Դավիթ Շահնազարյանը, ներքին գործերի նախարար Սերժ Սարգսյանը:
