Ինչպե՞ս ձևավորել Ամանորի սեղանը. հուշում է դիզայներ Արմեն Երիցյանը

ԵՐԵՎԱՆ, 31 դեկտեմբերի — Sputnik, Նանա Մարտիրոսյան. Նկարիչ ու դիզայներ Արմեն Երիցյանը խորհուրդ է տալիս օրիգինալ ու ճաշակով զարդարել տոնածառն ու տոնական սեղանը։ Կարելի է չօգտագործել եկող տարավ ամենանորաձև գույներն ու հավատարիմ մնալ սիրած երանգներին։ Այս մասին նա ասաց Sputnik Արմենիայի թղթակցի հետ զրույցում։

«Այս տարի դեռ դեկտեմբերի սկզբին զարդարեցի մեր տոնածառը։ Այն սև ու սպիտակ գույների մեջ է, օգտագործել եմ նաև մարմնագույն, ոսկեգույն ու մի քիչ նարնջագույն ժապավեններ ու ժանյակներ։ Ամեն տարի նոր խաղալիքներ եմ ավելացնում», - ասաց նկարիչը։

Երիցյանը պարտադիր չի համարում տոնածառը զարդարել եկող տարվա նորաձև գույներով։ Մասնավորապես դրանք են՝ կոռալի գույնն ու դրա բոլոր երանգները, կոբալտե կապույտը, կարմիր նարնջի գույնը ու կիտրոնայինը, խակի բոլոր երանգներն ընդհուպ մինչև դարչնագույնը։ Նա վստահ է, որ կարևոր է համադրել գույներն ու դրանք ճիշտ քանակությամբ օգտագործել։ 

Ինչ վերաբերում է Ամանորի սեղանին՝ ապա Երիցյանը խորհուրդ է տալիս զերծ մնալ կարմիրի, սպիտակի ու կանաչի համադրությունից, ինչը շատերն են անում։ Նրա կարծիքով՝ շատ ավելի հետաքրքիր է օգտագործել միագույն սպասք գեղեցիկ սբրոցներով ու բազմաթիվ աքսեսուարներով։ Զարդարելու համար կարելի է օգտագործել մոմեր, անձեռոցիկներ, ուլունքներ, սափորներ։ Նկարիչը խորհուրդ է տալիս սեղանը նրբաճաշակ դարձնելու համար հախճապակի ու գեղեցիկ սպասք օգտագործել։

Ըստ չինական օրացույցի՝ եկող տարին Դեղին Հողե Խոզի կամ Վարազի տարի է, իսկ դա ջերմության ու հարմարավետության խորհրդանիշն է։ Աստղաբանները խորհուրդ են տալիս ոչ միայն զարդարել տոնածառը, նաև զարդեր ավելացնել նաև շրջակա տարածքում։ Օրինակ, կոնֆետների տեսքով մոմեր՝ եղևնու կոներով ու դարչինի փայտիկներով, դեղին կլոր խաղալիքներ և ունեցվածքի ու շքեղության մասին հիշեցնող ամեն բան։