ԵՐԵՎԱՆ, 27 դեկտեմբերի — Sputnik. Խերսոնի քաղաքային դատարանը երկարացրել է ՌԻԱ Նովոստի Ուկրաինա հարթակի ղեկավար Կիրիլ Վիշինսկու կալանքը մինչև հունվարի 27–ը։ ՌԻԱ Նովոստիին այս մասին հայտնել է նրա փաստաբան Անդրեյ Դոմանսկին։
Նա նշել է, որ կալանքը երկարացնելու մասին միջնորդությունը մասամբ է բավարարվել։
Ավելի վաղ փաստաբանն իր երաշխավորությամբ Վիշինսկուն ազատ արձակելու խնդրագիր էր ներկայացրել։ Բացի այդ, պաշտպանները խնդրել էին, որ կիրառվի խափանման ցանկացած միջոց, կալանավորումից բացի։ Դատարանը մերժել է բոլոր միջնորդությունները։
Ռուսաստանի արտգործնախարարությունը մեկնաբանել է դատարանի որոշումն ու ընդգծել, որ «շինծու մեղադրանքով պետության դավաճանության մեջ մեղադրվող լրագրողի կալանքը ԶԼՄ–ների ազատության ոլորտում Ուկրաինայի միջազգային պարտականությունների աղաղակող խախտում է»։
«Կիևյան ռեժիմից պահանջում ենք դադարացնել Կ. Վ. Վիշինսկու հանդեպ իրավական ամենաթողությունը և անհապաղ ազատ արձակել նրան։ Կոչ ենք անում միջազգային կառույցներին արձագանքել ու այդ հարցում ճնշում գործադրել ուկրաինական իշխանության վրա», – ասել են ԱԳՆ–ում։
Վիշինսկուն ձերբակալել են Կիևում այս տարվա մայիսի 15–ին։ Ուկրաինայի հատուկ ծառայությունները նրան կասկածում են պետական դավաճանության մեջ։
ՌԴ նախագահ Վլադիմիր Պուտինը հայտարարել է, որ լրագրողին կալանքի մեջ պահելն անընդունելի է։
