ԵՐԵՎԱՆ, 27 դեկտեմբերի — Sputnik. Հայաստանի կառավարությունը հողատարածք հատկացրեց «Հին Երևան» թաղամասի շինարարության համար։ Այդ մասին որոշումն ընդունվեց կառավարության այսօրվա նիստում։
«Ի ԷՄ ՍԻ» կառուցապատող ընկերությունն այստեղ կվերականգնի 15 պատմական շենքեր, որոնք ապամոնտաժվել են Երևանի կենտրոնում։ Դրանք կկառուցվեն Երևան քաղաքի Աբովյան, Փավստոս Բուզանդ, Եզնիկ Կողբացի և Արամի փողոցներով պարփակված տարածքներում:
«Ի ԷՄ ՍԻ» ընկերությունը կապված է շվեյցարահայ միլիոնատեր Վարդան Սրմաքեշի հետ, որը Franck Muller ժամացույցների արտադրության ձեռնարկության սեփականատերն է։
«Հին Երևան» նախագիծը Երևանի կենտրոնում մոտ 100 000 քմ տարածք է ընդգրկում` Աբովյան փողոցից մինչև Կողբացի փողոց և Արամի փողոցից մինչև Բյուզանդի փողոց։ Նախագծի շրջանակում նախատեսված է վերականգնել XIX–րդ դարի վերջի, XX–րդ դարի սկզբի Երևանի ճարտարապետական տեսքը։ Ենթադրվում էր, որ «Հին Երևան» նախագիծը պետք է ավարտին հասցվեր 2010-2011 թվականներին, բայց կառավարությունը որոշակի խնդիրների պատճառով միայն 2014 թվականին է պայմանագիր կնքել Multicontinental distribution հետ։ Շինարարական աշխատանքները մեկնարկել են 2017 թվականին։
