ԵՐԵՎԱՆ, 26 դեկտեմբերի — Sputnik. ՀՀ առաջին փոխվարչապետի պաշտոնակատար Արարատ Միրզոյանը Ադրբեջանի արտգործնախարար Մամեդյարովին խորհուրդ է տալիս իր առաջարկը ներկայացնել Արցախի ժողովրդին։
Հիշեցնենք, որ երեկ` դեկտեմբերի 25–ին, Ադրբեջանի արտգործնախարար Էլմար Մամեդյարովը, խոսելով ղարաբաղյան հակամարտության լուծման ուղիների մասին, ասել էր, որ Բաքուն պատրաստ է ապահովել Արցախի հայության անվտանգությունը և նրանց բարձր մակարդակի ինքնակառավարման իրավունք տրամադրել:
«Պրն Մամեդյարովին խորհուրդ եմ տալիս առաջարկը ներկայացնել նաև Արցախի ժողովրդին․ ի վերջո արցախցիներն իրենք են որոշելու իրենց ճակատագիրը։ Դա նրանց բնական, անօտարելի, որևէ սպառնալիքով կամ զենքի ուժով չճնշվող իրավունքն է, և այդ իրավունքը ուշ թե շուտ պետք է ճանաչել»,–ֆեյսբուքյան իր պաշտոնական էջում գրել է Արարատ Միրզոյանը։
Հիշեցնենք նաև, որ իր հայտարարության մեջ Մամեդյարովը նշել էր. «Մեր երկիրը, ինչպես որ ապահովում է այլ էթնիկ խմբերի ներկայացուցիչ իր քաղաքացիների անվտանգությունը, պատրաստ է իր միջազգային պարտավորություններին համապատասխան դա անել նաև Լեռնային Ղարաբաղում հայկական ծագում ունեցող քաղաքացիների նկատմամբ և նրանց բարձր մակարդակով ինքնակառավարման իրավունք տալ Ադրբեջանի Հանրապետության միջազգայնորեն ճանաչված սահմանների շրջանակում» ։
Նրա խոսքով` ղարաբաղյան հակամարտության հարցում առաջխաղացումը «ամբողջ տարածաշրջանում խաղաղության, անվտանգության ու կայունության պայմաններ ստեղծելով, առաջին հերթին տնտեսական աճի հնարավորություն կտա Հայաստանին»։
