ԵՐԵՎԱՆ, 24 դեկտեմբերի — Sputnik. Լեհաստանի Հանրապետությունում ՀՀ նախկին դեսպան Էդգար Ղազարյանը «Հայ-լեհական բարեկամության կենտրոն» աշխատանքային անվանմամբ հասարակական կազմակերպություն կհիմնի: Այս մասին պարոն դեսպանը գրառում է արել Facebook-ի իր էջում:
Նման կառույց հիմնելու նպատակը, ըստ Ղազարյանի, տարբեր ոլորտներում հայ-լեհական բարեկամական հարաբերությունները ամրապնդելն ու զարգացնելն է:
Շահագրգիռ անձանց նա հրավիրում է դառնալ այդ նոր հիմնադրվող կազմակերպության համահիմնադիր կամ անդամ և խնդրում է անձնական հաղորդագրությունների տեսքով իրեն հայտնել այդ մտադրության մասին։
«Կարծում եմ այդ նախաձեռնությունը հետաքրքիր կլինի լեհական արմատներ ունեցող մեր հայրենակիցներին, Լեհաստանի հետ առևտրային, մշակութային, կրթական, գիտական և այլ կապեր ունեցող անձանց, ինչպես նաև տարբեր տարիներին Լեհաստանում կրթական ծրագրերին մասնակցություն բերած մեր երիտասարդներին»,- գրել է արտակարգ և լիազոր դեսպանը։
Հիշեցնենք, որ նախագահ Արմեն Սարգսյանի՝ սույն թվականի նոյեմբերի 13-ի հրամանագրով Էդգար Ղազարյանը հետ է կանչվել Լեհաստանի Հանրապետությունում Հայաստանի Հանրապետության արտակարգ և լիազոր դեսպանի պաշտոնից:
