ԵՐԵՎԱՆ, 24 դեկտեմբերի — Sputnik. ՀՀ ԱԺ փոխխոսնակ Արփինե Հովհաննիսյանը ֆեյսբուքյան իր էջում անդրադարձել է նախարարությունների օպտիմալացման խնդրին և ցույց տվել դրանցից բխող վտանգները։Ում համար են պահում կամ կրճատում նախարարությունները
Նրա խոսքով, երբ կրթության և գիտության նախարարության են միացվում մշակույթի և սպորտի նախարարությունները, այն դառնում է հսկայական կառույց է դառնում, որը նույնիսկ մեծ ցանկության դեպքում արդյունավետ չի կարող աշխատել:
«Սփյուռքի նախարարությունը վերացվում է, անունը ևս չի պահպանվում որևէ այլ նախարարության վերտառության մեջ, գործառույթները կիրականացնի ԱԳՆ։ Տրանսպորտի, կապի և տեղեկատվական տեխնոլոգիաների նախարարությունը այլևս բարձր տեխնոլոգիաների և ռազմարդյունաբերության նախարարություն է։
Այս ոլորտներին ուշադրություն դարձնել անկասկած պետք է, բայց արդյո՞ք առանձին նախարարություն ստեղծելու տեսքով։
Այս կապակցությամբ առաջանում են մի շարք հարցեր, մասնավորապես՝ հաշվի է առնվել նախարարի նախասիրությունը կամ մասնագիտացումը, թե՞ հաշվի է առնվել ՀՆԱ-ի մեջ այդ ոլորտների «մեծ» ծավալը կամ արդյոք ռազմական արդյունաբերության դեպքում հաշվի առնվել է, որ ներքին շուկան չափազանց փոքր է զարգացում ապահովելու համար, իսկ արտաքին շուկայի վրա հաշվարկի առումով ո՞րն է լինելու մեր մրցունակության հիմնական գրավականը` տրանսպորտային հարմար լոգիստիկա՞ն թե հմտությունները, գուցե սարքավորումնե՞րը, ինչ տրամաբանությամբ են հենց այս երկուսը առանձնացվել, եթե ռազմադյունաբերության մեջ առաջատար երկրներում առանձին նախարարություններ չկան: Նույն հաջողությամբ կարելի էր նաև ստեղծել ոսկերչության նախարարություն՝ հաշվի առնելով մեր փորձառությունը այս ոլորտում և գուցե ՀՆԱ-ի մեջ ավելի մեծ տոկոսը»,–իր մտահոգությունն է հայտնել պատգամավորը։
Նրա համար անհասկանալի է նաև մյուս «սուպեր» նախարարության ստեղծումը. «Էներգետիկայի նախարարությունը միանում է տարածքային կառավարման նախարարությանը: Այս նախարարության տիրույթ են տեղափոխվում նաև տրանսպորտը, պետական գույքի կառավարման կոմիտեն: Կրկին անհասկանալի նպատակով: Գյուղատնտեսության նախարարությունն էլ միանում է տնտեսական զարգացման նախարարությանը: Մտածեք ինչու: Հասկանաք՝ իմաց տվեք»,–հարցրել է Հովհաննիսյանը։
Նրա կարծիքով` կառավարման արդյունավետության տեսանկյունից բավական բարդ է տեսնել տրամաբանություն այս ամենի մեջ, քանզի մի քանի անհասկանալի նպատակով ստեղծված «սուպեր» նախարարությունների կողքին առանձին նախարարություն է մնում, օրինակ, արտակարգ իրավիճակների նախարարությունը:
«Ընդ որում, միջազգային փորձը ցույց է տալիս, որ առանձին արտակարգ իրավիճակների նախարարություններն այդքան էլ տարածված չեն, դրանք հիմնականում ոստիկանության հետ ընդգրկվում են ներքին գործերի նախարարության կամ այլ նախարարության կազմում։ Բացի դրանից միասնական ներքին գործերի նախարարություն ստեղծելով՝ ոչ միայն հնարավոր կլիներ իրականացնել էական խնայողություններ, այլ վարչապետ Փաշինյանը եզակի անգամ կկատարեր իր խոստումը, այն է ՝ ստեղծել համակարգ, որով Ոստիկանությունը հաշվետու կլիներ Ազգային ժողովին։
Հավանաբար, սակայն, նոր կառավարությունը իր կառուցվածքը որոշում է, ելնելով ոչ թե արդյունավետությունից, այլ այն հանգամանքից, թե արդյոք տվյալ նախարարության համար ունի հարմար նախարար, թե՞ ոչ»,–գրել է Հովհաննիսյանը:
Նրա կարծիքով` այս ամբողջ խառնաշփոթի մեջ տուժելու են չափազանց մեծ քանակությամբ մարդիկ, իսկ որ պակաս կարևոր չէ արդյունավետությունը լինելու է ծայրահեղ ցածր:
Վերջում պատգամավորը հույս է հայտնել, որ կառավարությունն ականջալուր կլինի հանրային արձագանքին և կփոխի իր որոշումը:
Իսկ օպտիմալացման գործընթացի արդյունքում իրավական խնդիրներով տուժած պետական ծառայողներին հայտնում իր պատրաստակամություն աջակցելու, եթե դրա կարիքը կունենան:
Հիշեցնենք, որ Դեկտեմբերի 10-ին, արտասահմանյան լրատվամիջոցների հետ հանդիպմանը ՀՀ վարչապետի պաշտոնակատար Նիկոլ Փաշինյանը հայտնել էր, որ նախարարությունների թիվը կառավարությունում պետք է կրճատվի 17-ից 12-ի և այդ հարցն արդեն քննարկվում է։
Մշակույթի և Սփյուռքի նախարարությունների ղեկավարները դեկտեմբերի 20-ին աշխատակազմի ժողովներում հայտարարել էին սպասվող կրճատումների մասին` նշելով, որ որոշ աշխատակիցներ 2019թ–ի հունվարի 1-ից կարող են աշխատանքի չգալ։ Դրա հետևանքով նախարարությունների մի քանի տասնյակ աշխատակիցներ գործադուլ էին հայտարարել ու բողոքի ակցիա կազմակերպել` ընդդեմ կառավարության այդ ծրագրի։
