ԵՐԵՎԱՆ, 23 դեկտեմբերի — Sputnik. Եկել է Սիրիային ցուցաբերվող մարդասիրական աջակցությունը Հայաստանի կողմից ակտիվացնելու ժամանակը։ Sputnik Արմենիայի թղթակցի հետ զրույցում նման կարծիք հայտնեց արաբագետ Սարգիս Գրիգորյանը։
«Եթե խոսքը մարդասիրական աջակցության մասին է, նման գործընթացներում Հայաստանի մասնակցության մասին, ես կարծում եմ, որ եկել է ժամանակը, որպեսզի Երևանն ակտիվություն դրսևորի», - ասաց Գրիգորյանը։
Նրա խոսքով՝ հայկական իշխանությունների ներկա քայլը պետք է ողջունել, այս փուլում դա ճիշտ որոշում է։
Այլ հարց է քաղաքական գործընթացներում ներգրավվելը։ Տվյալ դեպքում, արաբագետի կարծիքով, պաշտոնական Երևանը ծանրութեթև անելու շատ բան ունի, հատկապես Սիրիայի ապագայի վերաբերյալ անորոշության ֆոնին։
«Առայժմ մեզ հայտնի չեն ծրագրերը, որոնք քննարկվում են Սիրիայի և նրա իշխանությունների ապագայի մասով, մենք չպետք է շտապենք ու պետք է հավասարակշռված դիրքորոշում ցուցաբերենք», - ասաց Գրիգորյանը։
Նա կոչ է անում չմոռանալ, որ արդեն ազատագրված Հալեպի մերձակայքում է գտնվում Իդլիբ նահանգը, որը դեռ ահաբեկչական խմբավորումների հսկողության տակ է։ Նրանցից ամեն ինչ կարելի է սպասել, ուստի պետք չէ առաջ անցնել իրադարձություններից։
Ինչ վերաբերում է ապագային, ապա Գրիգորյանը հիշեցնում է հայ համայնքի և նրա դերի մասին, որը միշտ աջակցել է իշխանությանը՝ անկախ ղեկավարից։
«Դա այն դրական հեղինակությունն է, գործոնը, որն ունի հայ համայնքը։ Ով էլ Սիրիայում գլխավորի իշխանությունը, մենք հուսալի ենք նրա համար։ Այդ առումով մեր հիմնական աշխատանքը համայնքի դերի և նշանակության ավելացնում է Սիրիայի ապագայում», - ասաց Գրիգորյանը։
Թե ինչպես դա կընթանա, կախված է ԱԳՆ-ի և այլ գերատեսչությունների աշխատանքից, որոնք պետք է ռազմավարություն մշակեն։
«Մենք պետք է ցույց տանք, որ Սիրիայի հայ համայնքը և պատմամշակութային հուշարձանները կլինեն Հայաստանի կառավարության ուշադրության դաշտում», - նշեց փորձագետը։
Հիշեցնենք, որ հայ զինծառայողների մարդասիրական համակազմը Սիրիա ուղարկելու մասին պայմանավորվածությունը ձեռք է բերվել Հայաստանի վարչապետ Նիկոլ Փաշինյանի և ՌԴ նախագահ Վլադիմիր Պուտինի` սեպտեմբերին կայացած հանդիպման ժամանակ։
