Գեղեցիկ մատուցված նախաճաշ և «ախորժալի» լուսանկար. Երիցյանը գիտի դրական առավոտի գաղտնիքը

ԵՐԵՎԱՆ, 23 դեկտեմբերի — Sputnik, Նանա Մարտիրոսյան. Նկարիչ և դիզայներ Արմեն Երիցյանն արդեն երկար ժամանակ ուրախացնում է սոցիալական ցանցերի օգտատերերին իր հետաքրքիր գաղափարով։ Նա հրապարակում է գեղեցիկ ձևավորված նախաճաշի լուսանկարներ և «քարոզում» ճաշատեսակների մատուցման հանդեպ ստեղծագործ մոտեցում։

Երիցյանի առավոտը սկսվում է մի բաժակ անուշաբույր սուրճից և հերթական նախաճաշի լուսանկարից, որը նա հրապարակում է ժամը 9-ին կամ 10-ին։ Իհարկե, լինում են բացառություններ. նկարիչը լուսանկարներ չի հրապարակում սգո օրերին, օրինակ՝ ապրիլի 24-ին։ Նկարչի երևակայությունն անսահման է, ամեն անգամ նա հորինում է նախաճաշի ձևավորման մանրուքներ։

«Լինում է, որ երեկոյան գրում են և հարցնում, թե ի՞նչ եմ պատրաստելու հաջորդ օրը։  Բայց ես ինքս էլ չգիտեմ, քանի որ որոշում եմ առավոտյան՝ կախված տրամադրությունից և սառնարանի պարունակությունից», - ասաց դիզայները Sputnik Արմենիայի թղթակցի հետ զրույցում։

Երիցյանի որոշ բաժանորդներ հրապարակումից հետո նույնպիսի նախաճաշ են պատրաստում, լուսանկարում և ուղարկում նկարները դիզայներին։

«Ոմանց հետ ես արդեն ծանոթացել եմ։ Հաճելի է, որ իմ գաղափարը դուր է գալիս մարդկանց», - խոստովանեց նկարիչը։

Երիցյանը նախաճաշին հաճախ նախընտրում է ձու, գիտի պատրաստման տարբեր բաղադրատոմեր։ Որպես ափսե կարող է ծառայել հացը կամ ուրիշ մթերք։ Օգտատերերը հետաքրքիր են համարում նախաճաշի նման մատուցումը և ողջունում դիզայների ստեղծագործ մոտեցումը։ Նկարիչը գնում է և հավաքում գեղեցիկ սպասք, բայց պատահում է նաև, որ նրան նվիրում են խոհանոցային կահ-կարասի։

«Ես շատ օրիգանալ ամաններ եմ նվեր ստացել։ Դրանք թե՛ հայ վարպետների կերամիկական աշխատանքներ են, թե՛ իտալական, թե՛ անգլիական սպասք։ Ինքս նույնպես հաճախ եմ գնում։ Այսօր գնել եմ զանգակի տեսքով կորալագույն ափսե», - պատմեց նա։

Նկարիչը խոստովանեց, որ իր տրամադրությունը կարելի է հասկանալ նախաճաշի ձևավորումից՝ գույնով, մթերքներով և նույնիսկ ընտրված սպասքով, սովորաբար նախաճաշից հետո ամեն ինչ փոխվում է։ Երիցյանը խորհուրդ է տալիս չալարել և անպայման նախաճաշել առավոտյան, զարդարել առավոտը և օրը լիցքավորել դրական էներգիայով։ Նա խորհուրդ է տալիս հունվարի 1-ը սկսել սիրելի սուրճից և սառը շամպայնից։