ԵՐԵՎԱՆ, 20 դեկտեմբերի — Sputnik. Ազգային ժողովի երրորդ ընդդիմադիր փոխնախագահի պաշտոնում «Լուսավոր Հայաստան» խմբակցությունը կառաջադրի Մանե Թանդիլյանի թեկնածությունը: Facebook սոցիալական ցանցում այս մասին գրել է նորընտիր պատգամավոր Անի Սամսոնյանը։
ԱԺ կանոնակարգ օրենքով նախատեսված է, որ բոլոր քաղաքական ուժերը կարող են թեկնածու առաջադրել, և կապ չունի, թե որքան է նրանց մանդատների թիվը խորհրդարանում:
Ավելի վաղ լուրեր էին պտտվում, որ ԱԺ փոխնախագահի հնարավոր թեկնածուն «Բարգավաճ Հայաստան» կուսակցության ցուցակով պատգամավոր ընտրված Նաիրա Զոհրաբյանն է։ Նա Sputnik Արմենիայի հետ զրույցում նշել էր, որ կուսակցությունում այդ հարցը չի քննարկվել։ «Որտեղ Գագիկ Ծառուկյանը կորոշի, որ իմ ունակությունները, իմ պրոֆեսիոնալիզմը, իմ փորձառությունը պետք են, ես այդտեղ կլինեմ»,– ասել էր նա։
Երեկ հայտնի դարձավ, որ «Իմ քայլը» խորհրդարանի խոսնակի պաշտոնում կառաջադրի փոխվարչապետի պաշտոնակատար Արարատ Միրզոյանի թեկնածությունը, իսկ փոխխոսնակի պաշտոնում` պատգմավորներ Լենա նազարյանի և Ալեն Սիմոնյանի թեկնածությունները։
