ԵՐԵՎԱՆ, 20 դեկտեմբերի — Sputnik, Արմենուհի Մխոյան. Վերջին տարիներին սովորույթ է դարձել՝ Գյումրին Երևանից շուտ է վառում գլխավոր տոնածառի լույսերը՝ ազդարարելով տոնական միջոցառումների մեկնարկը: Այս տարի էլ առաջ ընկնելով` դեկտեմբերի 20-ին Գյումրու քաղաքապետ Սամվել Բալասանյանը գյումրեցի փոքրիկների հետ վառեց Վարդանանց հրապարակի տոնածառի լույսերը:
Ի տարբերություն մայրաքաղաքի, այստեղ տոնածառի հարցում «պահպանողական» են։ Այս տարի ամեն ինչ գրեթե նույնն է։ Աննշան փոփոխության կա, բայց դա չի խանգարում գյումրեցիներին պարծենալ. «Գյումրու 3 միլիոնանոց տոնածառը շատ սիրուն է, մեր վերմակին հարմար, ոչ թե 71 մլն»:
Ի դեպ, այս տարի ևս գլխավոր տոնածառն ապահովության համար կապված է երեք փոքր տոնածառով: «Գյումրիում 3 մլն-ով 3 տոնածառ է դրվել, Երևանում 71 մլն–ով՝ միայն մեկը»,-Sputnik Արմենիայի թղթակից հետ կատակեցին գյումրեցիները:
Հավելենք` Գյումրու քաղաքապետը հաջորդ տարվա համար ևս գյումրեցիներին համբերություն է մաղթում, որովհետև ավելի շատ փողոց է քանդվելու: «2019 թվականին շատ գործ ունենք անելու։ Զգուշացնում ենք քաղաքի բնակիչներին՝ անհարմարություններ ենք ստեղծելու, եթե 2018 թվականին 12 փողոց քանդեցինք, հաջորդ տարի քանդելու ենք 33–ը, բայց դրանք կառուցվելու են: Բացի դրանից, ավելանալու է նաև լուսավորությունը, կփորձենք ավելացնել նաև տրանսպորտային միջոցների քանակը, փորձում ենք նաև լավացնել աղբահանությունը։ Քաղաքը պետք է դարձնենք տուրիստական այն քաղաքը, որը բոլորս ուզում ենք»,-իր խոսքում նշեց քաղաքապետը` չմոռանալով նաև շնորհավորել ողջ հայ ազգին Ամանորի կապակցությամբ:
Այս տարի տոնածառի տեղադրման, ապամոնտաժման աշխատանքների, լույսերի տեղադրման, հրավառության կազմակերպման, նաև զարդարանքներին թարմ շունչ հաղորդելու համար համայնքի բյուջեից հատկացվել է 3 միլիոն ՀՀ դրամ:
