ԵՐԵՎԱՆ, 19 դեկտեմբերի — Sputnik. ՀՀ վարչապետի պաշտոնակատար Նիկոլ Փաշինյանը համաձայն չէ պնդումների հետ, թե իր նոր խորհրդական Արշակ Կարապետյանն է քառօրյա պատերազմի պատասխանատուն։ Այդ մասին նա այսօր ասաց լրագրողներին։
Հիշեցնենք` դեկտեմբերի 17-ին ՀՀ վարչապետի պաշտոնակատար Նիկոլ Փաշինյանի խորհրդական է նշանակվել Արշակ Կարապետյանը, որ ժամանակին ՀՀ ԶՈՒ գլխավոր շտաբի հետախուզության վարչության պետն էր։ 2016-ի ապրիլյան պատերազմից անմիջապես հետո նախագահ Սերժ Սարգսյանի հրամանագրով Կարապետյանն ազատվել էր այդ պաշտոնից։ Շատերը համարում էին, որ հենց նա էր ապրիլյան պատերազմի զոհերի ու տարածքային կորուստների պատասխանատուն։
Փաշինյանի խոսքով` մարդու հասցեին մեղադրանքները և հայտարարությունները դատավճիռ չեն։ Ավելին, երբ ասում են, որ Կարապետյանը կրում է գլխավոր պատասխանատվությունը, ապա նշանակում է, որ նա վերադաս ղեկավարություն չի ունեցել, ինչը, իհարկե, այդպես չէ։
«Նրանք, ովքեր հիշատակում են, որ Արշակ Կարապետյանին Սերժ Սարգսյանը հանել է գործից այդ իրադարձություների հետևանքով, նրանք ասում են, որ Սարգսյանն արդար դատավոր է և արդար որոշում է կայացրել: Ես քառօրյա պատերազմի վերաբերյալ կարդացել եմ տասնյակ, եթե ոչ հարյուրավոր էջերով գաղտնի նյութեր, և այդ նյութերում ոչինչ չեմ գտել հետախուզական տվյալների բացակայության կամ պակասության մասին», - ասաց Փաշինյանը։
Նա խոստովանեց, որ հասարակությունը բազմաթիվ հարցեր ունի ապրիլյան պատերազմի վերաբերյալ, և կառավարությունը հնարավորության դեպքում կիրազեկի մարդկանց։
