ԵՐԵՎԱՆ, 14 դեկտեմբերի — Sputnik. ՀՀ քաղաքացին, որը փորձել է ապօրինի ճանապարհով երեք կիլոգրամ ոսկերչական իր անցկացնել, ձերբակալվել է Մոսկվայի «Շերեմետևո» օդանավակայանում։ Այս մասին հայտնում է Շերեմետևոյի մաքսայինի մամուլի ծառայությունը։
Հայտնում են, որ տղամարդը եկել է Ստամբուլ–Մոսվկա չվերթով ու մաքսային ծառայությունը ձերբակալել է նրան կանաչ միջանցքում։
Բանավոր հարցաքննության ժամանակ տեսուչը հարցրել է` արդյոք նա պարտադիր հայտարարագրելու ենթակա ապրանք ունի, տղամարդն ասել է՝ ոչ։
Ձեռքի բեռները զննելուց մաքսայինները հայտնաբերել են քարերով ոսկերչական իրեր՝ ականջօղեր, թևնոցներ, կախազարդեր, մատանիներ, ընդհանուր առմամբ՝ 618 հատ, 75 կոմպլեկտ ու 275 զույգ։
Ապրանքի գինը հաստատող փաստաթղթերի բացակայության պատճառով մաքսային ծառայության պաշտոնյաները մաքսային փորձաքննության անցկացման մասին որոշում են կայացրել։
ՀՀ քաղաքացու գործողություններում իրավական խախտումների հատկանիշներ են դիտվում, որոնք հետապնդվում են Ռուսաստանի Դաշնության Վարչական խախտումների մասին օրենքով։
