ԵՐԵՎԱՆ, 18 դեկտեմբերի — Sputnik. ՀԱՊԿ նոր գլխավոր քարտուղար նշանակելուց հետո կառույցի արդյունավետությունը պետք է բարձրանա։ Այսօր` դեկտեմբերի 18-ին, հրավիրված ասուլիսի ժամանակ այս մասին ասաց Հայաստանում Ռուսաստանի արտակարգ և լիազոր դեսպան Սերգեյ Կոպիրկինը։
«Այս հարցում Ռուսաստանի դիրքորոշումը հիմնված է կազմակերպությունն ամրապնդելու, անդամ երկրների միջև համաձայնությունն ամրապնդելու հիմնարար շահի վրա», – ասաց Կոպիրկինը։
Դեսպանի խոսքով` Ռուսաստանը շահագրգռված է, որ հարցը լուծվի առանց կազմակերպության արդյունավետությունը վնասելու. ՀԱՊԿ–ը պետք է ամրանա նաև իրավական հարցերը կատարելագործելու, այս կամ այն հարցի շուրջ անճշտությունները պարզելու շնորհիվ։
Ինչ վերաբերում է նոր գլխավոր քարտուղարին, ապա այդ հարցը լուծվում է պետությունների առաջնորդների մակարդակով։
«Կարծում եմ, որ ընդունվելիք որոշման հիմքում կլինի կազմակերպությունն ամրապնդելու մեր ընդհանուր շահագրգռվածությունը», – նշեց Կոպիրկինը։
Հիշեցնենք, որ ՀԱՊԿ նախկին գլխավոր քարտուղար Յուրի Խաչատուրովը ՀՀ-ում հարուցված քրեական գործի շրջանակում պաշտոնանկ է արվել նոյեմբերի սկզբին: ՀԱՊԿ գլխավոր քարտուղարի պարտականությունները ստանձնել է Խաչատուրովի տեղակալ Վալերի Սեմերիկովը։
