ԵՐԵՎԱՆ, 15 դեկտեմբերի — Sputnik. Մարդասպանն ազգություն չունի, այսօր հրավիրված ասուլիսի ժամանակ ասաց Հայաստանի ԱԱԾ ղեկավար Արթուր Վանեցյանը՝ մեկնաբանելով Գյումրիում տեղի ունեցած վերջին աղմկահարույց դեպքը։
«Մարդասպանը չունի ազգություն, մասնագիտական պատկանելություն։ Մարդասպանը մնում է մարդասպան։ Նրան պետք է գտնել և պատժել օրենքի ամբողջ խստությամբ», - ասաց Վանեցյանը։
Նրա խոսքով` եթե հանցագործությունը կատարվել է Հայաստանի տարածքում, ապա մեղավորը պետք է դատվի երկրի տարածքում։ Մնացածը դատախազության պատասխանատվության ոլորտում է։
Հիշեցնենք` դեկտեմբերի 3-ին Գյումրիում 57 տարեկան մի կին մահացել էր մարմնական ծանր վնասվածքների պատճառով։ ԶԼՄ–ները հայտնել էին, որ կնոջ սպանության կասկածյալը ռազմակայանի պայմանագրային զինծառայողներից մեկն է։
Դեկտեմբերի 3-ին Հայաստանում Ռուսաստանի դեսպանությունը հերքեց այդ տեղեկությունը։
Ավելի ուշ զորամասի հրամանատարությունը Գյումրիում ՌԴ գլխավոր հյուպատոսություն ներկայացուցիչների և ՀՀ ոստիկանության հետ համատեղ պարզել էր, որ ռուս զինծառայողն առնչություն չունի այդ դեպքի հետ։
Դեկտեմբերի 11-ին Հայաստանի դատախազությունը հայտարարեց, որ Գյումրիում տեղակայված 102-րդ ռազմակայանի զինծառայողներից մեկը կալանավորվել է կին հավաքարարի սպանության գործով։
Այժմ կասկածյալը մեկ այլ զինծառայող է։
