ԵՐԵՎԱՆ, 15 դեկտեմբերի — Sputnik. ԱԱԾ ղեկավար Արթուր Վանեցյանը քաղաքական կարիերա կառուցել ծրագրեր չունի։ Այդ մասին նա ասաց այսօր հրավիրված ասուլիսի ժամանակ։ Նա նշեց, որ ուրախ է բարձր վարկանիշ ունենալու համար, բայց դա իր անձնական վաստակը չէ, այլ ամբողջ կառույցի։ ԱԱԾ ղեկավարը երկար ժամանակ աշխատել է համակարգում, և նրա վարկանիշը բարձրացել է ներկա վարչապետի իրականացրած ոչ բռնի հեղափոխության շնորհիվ։
«Ժողովուրդը սկսեց ընդունել և հավատալ իշխանություններին։ Այդ պայմաններում ձեռք բերվեց այսօրվա վարկանիշը։ Առանց վարչապետի այդ վարկանիշը, որը հիմա ունեմ, երբեք չէր լինի», - ասաց Վանեցյանը։
Նրա խոսքով՝ այսօր բնակչության ճնշող մեծամասնությունը սիրում և ընդունում է ԱԱԾ-ին։
«Ես այդ վարկանիշը քաղաքական կապիտալի վերածելու նպատակ չունեմ։ Ես զինվորական եմ, հատուկ ծառայությունների գնդապետ և ես մտադրություն չունեմ զբաղվելու քաղաքականությամբ» , - ասաց նա։
Վանեցյանը հավելեց, որ երբեք չի մտածել վարչապետ դառնալու մասին։ Նա նշեց, որ ընդհանուր առմամբ ոչինչ չի բացառում, բայց սա այդ դեպքը չէ։
