ԵՐԵՎԱՆ, 15 դեկտեմբերի – Sputnik. Ազգային անվտանգության ծառայության տնօրեն Արթուր Վանեցյանը շահագրգռված է, որ ՀՀ երկրորդ նախագահ Ռոբերտ Քոչարյանի պաշտպանները հնարավորինս շուտ դիմեն ՄԻԵԴ և ստանան իրենց հուզող հարցերի պատասխանը: Այս մասին այսօր՝ դեկտեմբերի 15-ին, Ծաղկաձորում ԱԱԾ-ի կազմակերպած սեմինարի ժամանակ ասաց ՀՀ ԱԱԾ տնօրեն Արթուր Վանեցյանը։
«Ցանկացած պաշտպանական կողմ, փաստաբանների խումբ կամ փաստաբան կարող է դիմել ցանկացած մարմնի, որպեսզի ստանա այս կամ այն հարցի պատասխանը կամ որոշում: Ես չեմ ուզում որևէ գնահատական տալ կամ կարծիք հայտնել: ՄԻԵԴ-ը այն կառույցն է, որ այդ հարցի պատասխանը կտա, ես երևի թե ամենաշահագրգռված անձանցից եմ, որ պաշտպանները որքան հնարավոր է շուտ դիմեն այդ դատարան և ստանան իրենց հուզող հարցերի պատասխանը»,-ասաց նա:
Հիշեցնենք` ՀՀ 2–րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։ Քոչարյանին կալանավորեցին և ազատ արձակեցին օգոստոսի 13-ին։
Նոյեմբերի 27-ից Վերաքննիչ դատարանում քննվում էր Ռոբերտ Քոչարյանի նկատմամբ ընտրված խափանման միջոց կալանավորման որոշումն անձեռնմխելիության հիմքով վերացնելու վերաբերյալ նրա պաշտպանների բողոքը։ Ավելի վաղ Վճռաբեկ դատարանը նույն հիմքով բողոքի հիման վրա որոշում էր կայացրել գործն ուղարկել լրացուցիչ քննության։ Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել էր անձեռնմխելի և ազատել կալանքից: Ավելի ուշ քրեական գործի նախաքննությունը վարող ՀՔԾ քննիչը որոշում էր կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին:
Դեկտեմբերի 7-ին Քոչարյանին երկրորդ անգամ կալանավորեցին։ Նրա փաստաբանները հայտարարեցին, որ նրան կալանավորելու որոշումը մտադիր են բողոքարկել Մարդու իրավունքների եվրոպական դատարանում։
