ԵՐԵՎԱՆ, 14 դեկտեմբերի — Sputnik. Մեծ Բրիտանիայում դատարանը թույլ է տվել բժիշկներին անդամահատել հիվանդի ոտքը նրա կամքին հակառակ, հաղորդում է ՌԻԱ Նովոստին։
Բժիշկների կարծիքով` փտախտից տառապող հիվանդի ոտքը պետք է կտրել, հակառակ դեպքում հիվանդության զարգացումը սպառնում է նրա կյանքին։ Չնայած դրան` տղամարդը, որի անունը չի նշվում, հրաժարվել է վիրահատությունից։
Հիվանդանոցի ղեկավարությունը դիմել է դատարան։ Դատավորը հանգել է հետևության, որ հիվանդի գործունակության աստիճանը թույլ չի տալիս նրան ինքնուրույն ընտրել բուժման մեթոդը։
Դատարանը թույլ է տվել անդամահատել նրա վերջույթը և վիրահատությունը հաջող կատարելու համար թույլ տվել բժիշկներին ֆիզիկապես սահմանափակել հիվանդի շարժումները։
Մեծ Բրիտանիայում 16 տարին լրացած քաղաքացիների բուժումն անհնար է առանց նրանց համաձայնության։
Բացառություն է արվում այն դեպքում, երբ բժիշկների կարծիքով հիվանդն ի վիճակի չէ կայացնել գիտակցված որոշում, օրինակ, հոգեկան խանգարման պատճառով։
