ԵՐԵՎԱՆ, 14 դեկտեմբերի — Sputnik. Սյունիքում տեղի ունեցած ողբերգական ավտովթարի պատճառը, ըստ նախնական տվյալների, եղել է այն, որ մարդատար մեքենան դուրս է եկել հանդիպակաց գոտի և բախվել ավտոբուսին։ Այս մասին հայտնում է ՀՀ քննչական կոմիտեի մամուլի ծառայությունը։
Հիշեցնենք, որ դեկտեմբերի 13-ին, ժամը 16։00-ի սահմանում Երևան-Մեղրի ավտոճանապարհի 178․1-րդ կմ-ում 58-ամյա երևանցին իր վարած «Օպել Զեֆիրա» մակնիշի ավտոմեքենայով դուրս էր եկել ճանապարհի հանդիպակաց գոտի և բախվել դիմացից եկող ավտոբուսին։
Հայտնի է, որ ավտովթարի հետևանքով տեղում մահացել են մարդատար ավտոմեքենայի վարորդն ու երկու ուղևորները` 52 և 46–ամյա կանայք։
Իրանական համարանիշով «Սկանիա» ավտոբուսը վարել է Իրանի Իսլամական Հանրապետության քաղաքացին։ Վթարի հետևանքով ավտոբուսի ուղևորներից մեկը, որը Երևանի բնակիչ է, մարմնական վնասվածքներով տեղափոխվել է հոսպիտալ:
Դեպքի առթիվ ՀՀ քննչական կոմիտեի Սյունիքի մարզային քննչական վարչությունում հարուցվել է քրեական գործ։ Կատարվել է դեպքի վայրի զննություն, նշանակվել են դատաբժշկական փորձաքննություններ:
Նշենք, որ վիրավորներին առաջինը օգնության էին հասել քաղաքացիները, մահացածներին ավտոմեքենայից դուրս էին բերել փրկարարներն ու ճանապարհային ոստիկանները:
