ԵՐԵՎԱՆ, 13 դեկտեմբերի - Sputnik. Մոսկվան հույս ունի կառուցողական երկխոսություն վարել Հայաստանի նոր իշխանությունների հետ։ Այս մասին ավանդական ճեպազրույցի ժամանակ ասաց ՌԴ ԱԳՆ պաշտոնական ներկայացուցիչ Մարիա Զախարովան։
«Դեկտեմբերի 16–ին ՀՀ ԿԸՀ–ն պաշտոնապես կհայտարարի քվեարկության արդյունքները։ Մենք տրամադրված ենք կառուցողական երկխոսություն վարել ձևավորվող կառավարության ու խորհրդարանի հետ, մեր երկրների միջև, այդ թվում ԵԱՏՄ, ՀԱՊԿ ու ԱՊՀ շրջանակներում, հետագա փոխհամագործակցությունն ամրապնդելու համար։ Երկկողմանի հարաբերությունների զարգացման հսկա ներուժ ունենք», – ասել է Զախարովան։
Նա ընդգծել է, որ խոսքը ոչ թե մեկ ուղղությամբ հարաբերությունները խորացնելու մասին է, այլ ավելի վաղ եղած կապերի զարգացման ու խորացման։ Նրա խոսքով` հնարավոր է նաև համագործակցության նոր ոլորտներ բացահայտել։
«Մենք երկկողմանի հարաբերությունների զարգացման հիանալի դինամիկա ունեինք, որը տարիներով կառուցվում էր և օգուտ էր տալիս երկու երկրների ժողովուրդներին։ Կարծում եմ` Հայաստանում դրա մասին գիտեն։ Գիտեն նաև այն մասին, թե ինչ ներդրում է արել Ռուսաստանը երկկողմ հարաբերությունների զարգացման համար, լինի դա քաղաքական կամքի, թե նյութական պաշարների տեսքով», – ասել է Զախարովան։
Նրա խոսքով` Ռուսաստանը շահագրգռված է, որ բարեկամ ժողովուրդները ծաղկեն։ Դա առաջին հերթին իրեն է ձեռնտու։
Նշենք, որ ԿԸՀ–ի նախնական տվյալներով, ԱԺ արտահերթ ընտրության քվեարկությանը մասնակցել են 1 միլիոն 260 հազար 840 քաղաքացի կամ ընտրողների 48.63%–ը։ Հայաստանի Հանրապետական կուսակցությունը ստացել է ձայների 4.70%–ը, «Քաղաքացու որոշում» սոցիալ–դեմոկրատական կուսակցությունը` 0.68%–ը, «Հայ Յեղափոխական դաշնակցություն» կուսակցությունը` 3.89%–ը, «Իմ քայլը» դաշինքը` 70.43%–ը, «Լուսավոր Հայաստան» կուսակցությունը` 6.37%–ը, «Քրիստոնեա-ժողովրդական վերածնունդ» կուսակցությունը` 0.51%–ը, «Ազգային առաջընթաց» կուսակցությունը` 0.33%–ը, «Մենք» դաշինքը` 2. 00%–ը, «Օրինաց երկիր» կուսակցությունը` 0.99%, «Սասնա ծռեր» համահայկական կուսակցությունը` 1.82%–ը, «Բարգավաճ Հայաստան» կուսակցությունը` 8.27%–ը։
