ԵՐԵՎԱՆ, 13 դեկտեմբերի — Sputnik. Աշակերտներն ու ուսուցիչները տարեկան երեք անգամ կկարողանան անվճար թանգարաններ հաճախել։ Գրանցման համապատասխան համակարգ կմշակվի Dasaran.am (ՀՀ կառավարության և միջազգային կազմակերպությունների աջակցմամբ ստեղծված կրթական պորտալ) կայքում։
Որոշումն ընդունվեց ՀՀ կառավարության այսօրվա նիստում։
Վարչապետի պաշտոնակատար Նիկոլ Փաշինյանը հետաքրքրվեց, թե արդյոք չի կարելի նման աբոնեմենտ սահմանել նաև համերգներ և թատրոններ այցելելու համար։
«Թանգարանների պարագայում ավելի հեշտ է։ Այնտեղ օրինակ, դահլիճի ծանրաբեռնվածության խնդիր չկա։ Սակայն աշակերտների համար ծրագրեր կան նաև թատրոնների և համերգների համար», – պարզաբանեց Կրթության և գիտության նախարարի պաշտոնակատար Արայիկ Հարությունյանը։
Առաջին փոխվարչապետ Արարատ Միրզոյանն իր հերթին հիշեց նաև բանտարկյալների մշակութային պահանջմունքների մասին։
«Գուցե, բանտեր և՞ս պետք է արվեստի գործեր բերել ցուցադրության», – ավելացրեց նա։
Այս նախաձեռնությունը կառավարությունը նույնպես որոշեց քննարկել ապագայում։
