ԵՐԵՎԱՆ, 10 դեկտեմբերի — Sputnik. Վերջին 20 տարում Հայաստանում առաջին անգամ տեղի են ունեցել ընտրություններ, որտեղ իր գործուն ազդեցությունը չի ունեցել կրիմինալը, փողաբաժանությունն ու կեղծիքները: Դեկտեմբերի 9-ին կայացած Ազգային ժողովի արտահերթ ընտրությունների մասին նման հայտարարություն է տարածել նախնական արդյունքներով խորհրդարան չանցած «Մենք» դաշինքը։
«Այո՛, այս ընտրություններն անցել են առանց էական խախտումների և միջադեպերի, բայց նաև ակնհայտ է բոլորի համար, որ նախընտրական քարոզարշավի ընթացքում բովանդակային, գաղափարական և ծրագրային պայքար այդպես էլ տեղի չի ունեցել, որի արդյունքում էլ ունեցանք միաբևեռ Ազգային ժողով, ինչը երկրի զարգացման տեսանկյունից և խորհրդարանական կառավարման համակարգի կայացման առումով դրական երևույթ չէ»,– ասված հայտարարության մեջ։
«Մենք» դաշինքը շնորհակալությունն է հայտնում իր ընտրողներին` վստահության համար` նշելով, որ յուրաքանչյուր քվեն պարտավորեցնում է ավելի մեծ թափով աշխատել և ստեղծել գաղափարակիցների բանակ` հանուն Հայաստանի և ՀՀ քաղաքացու բարօրության:
