ԵՐԵՎԱՆ, 10 դեկտեմբերի — Sputnik. ԵՄ–ն բավականին շահագրգիռ է Հայաստանի հետ համագործակցությամբ։ Դրանով է պայմանավորված Եվրախորհրդարանի ներկայացուցիչների ակտիվ մասնակցությունը ԱԺ ընտրությունների դիտորդական առաքելությանը։ Այս մասին երկուշաբթի հրավիրված մամուլի ասուլիսին ասաց Եվրախորհրդարանի պատգամավոր, ԵՄ օրենսդրական մարմնից կողմից Հայաստանում դիտորդական առաքելության ղեկավար Հեյդի Հաուտալան։
Նա կարծում է, որ Հայաստանի ընտրական համակարգում զգալի փոփոխություններ են տեղի ունեցել։
«Կուսակցություններն ու ԿԸՀ–ն քիչ ժամանակ են ունեցել ընտրություններին նախապատրաստվելու համար։ Սակայն նրանք ընտրություններն անցկացրել են շատ բարձր մակարդակով։ Ուրախ ենք ընտրական պրակտիկայում մեծ փոփոխություններ փաստել։ Միջազգային հանրությունը պատրաստ է Հայաստանին իր աջակցությունը ցուցաբերել», – նշեց Հաուտալան։
Նա առաջին անգամ է տեսնում ընտրական գործընթացներում քաղաքացիական հանրության ներկայացուցիչների այսքան մեծ ներկայություն։ Հաուտալան ընդգծեց նաև, որ խախտումները նվազագույնի էին հասցվել։ Յուրաքանչյուրը կարողացել էր իր կամքն արտահայտել։
«Նախորդ ընտրություններում կաշառքների բաժանում և ընտրատեղամասերի մոտ ավտոբուսների կուտակումներ էինք տեսնում։ Սակայն երեկ նման բան չկար», – նշեց նա։
ԵԱՀԿ-ի ժողովրդավարական հաստատությունների և մարդու իրավունքների բյուրոյի ներկայացուցիչ Ուրսուլա Գաշեկն իր հերթին ասաց, որ քաղաքացիների իրավունքներն ու ազատությունն ընտրություններին ապահոված էր։
«Հետապնդումներ, ճնշումներ չեն եղել։ Կարող եմ վստահաբար ասել, որ Հայաստանում մինչ օրս նման ընտրություններ չեն եղել։ Պատրաստ ենք օգնել Հայաստանին», – ավելացրեց նա։
Գաշեկը փաստեց նաև, որ քաղաքական ուժերի հռետորաբանությունը նախընտրական քարոզարշավի ընթացքում փոքր–ինչ չէր համապատասխանում քաղաքակիրթ պայքարի տրամաբանությանը։ Սակայն ընտրությունների որակի վրա դա որևէ կերպ չի ազդել։
