ԵՐԵՎԱՆ, 10 դեկտեմբերի — Sputnik. ՀՀ ԱԺ ընտրություններն անցել են հանգիստ ու առանց ընթացակարգի լուրջ խախտումների։
Այս մասին այսօր լրագրողներին ասաց Ընտրությունները դիտարկող կազմակերպությունների եվրոպական ցանցի (ENEMO) դիտորդական առաքելության ղեկավար Զլատկո Վույովիչը:
«Արտահերթ խորհրդարանական ընտրություններն անցել են խաղաղ միջավայրում և համապատասխանել են միջազգային ստանդարտներին և տեղական օրենսդրությանը: Ընտրություններն, ընդհանուր առմամբ, անցել են բավական կազմակերպված, թեև կային որոշակի ընթացակարգային խախտումներ մի շարք ընտրատեղամասային հանձնաժողովների անդամների կողմից՝ հիմնականում տեղեկատվության պակասի պատճառով»,- ասաց Վույովիչը:
Բայց, ընդհանուր առմամբ, դիտորդի տեսակետից չի եղել ոչ մի այնպիսի բան, որը կասկած կհարուցեր ընտրությունների արդյունքի վերաբերյալ։ Հայաստանը ընթացակարգի պահպանման հարցում մեծ քայլ է արել դեպի առաջ։
Նա ավելացրեց, որ հիմա ընտրական համակարգի աշխատանքն ամբողջովին կախված է լինելու ներկայիս իշխանության քաղաքական կամքից։
«Նախընտրական քարոզարշավը իրականացվել է հավասար պայմաններում, և ընտրողները ընտրությունների ժամանակ կարողացել են արտահայտել իրենց կամքը: Բայց և՛ ընտրողների հետ հանդիպումների ժամանակ, և՛ բանավեճերի ընթացքում թեկնածուները հիմնականում «թիրախավորում» էին միմյանց, անցնելով անձերի ու քիչ էին քննարկում ծրագրերն ու դրանց տարբերությունները»,- ընդգծեց Վույովիչը:
Նշենք, որ ԿԸՀ–ի նախնական տվյալներով, ԱԺ արտահերթ ընտրության քվեարկությանը մասնակցել են 1 միլիոն 260 հազար 840 քաղաքացի կամ ընտրողների 48.63%–ը։ Հայաստանի Հանրապետական կուսակցությունը ստացել է ձայների 4.70%–ը, «Քաղաքացու որոշում» սոցիալ–դեմոկրատական կուսակցությունը` 0.68%–ը, «Հայ Յեղափոխական դաշնակցություն» կուսակցությունը` 3.89%–ը, «Իմ քայլը» դաշինքը` 70.43%–ը, «Լուսավոր Հայաստան» կուսակցությունը` 6.37%–ը, «Քրիստոնեա-ժողովրդական վերածնունդ» կուսակցությունը` 0.51%–ը, «Ազգային առաջընթաց» կուսակցությունը` 0.33%–ը, «Մենք» դաշինքը` 2. 00%–ը, «Օրինաց երկիր» կուսակցությունը` 0.99%, «Սասնա ծռեր» համահայկական կուսակցությունը` 1.82%–ը, «Բարգավաճ Հայաստան» կուսակցությունը` 8.27%–ը։
