ԿԸՀ–ն հայտնեց, որ այսօր Ազգային ժողովի քվեարկությանը մասնակցել է 1 260 հազար 840 մարդ` ընտրելու իրավունք ունեցող քաղաքացիների 48.63 տոկոսը։
Ժամը 14։00–ի դրությամբ ԱԺ արտահերթ ընտրության քվեարկությանը մասնակցել է ընտրողների 24,53 տոկոսը։ Այս մասին քիչ առաջ լրագրողներին հայտնեց ԿԸՀ անդամ Սիլվա Մարկոսյանը։
Նրա խոսքով` ընտրելու իրավունք ունեցող 2 592 479 քաղաքացիներից ընտրությանը մասնակցել է 636 055 –ը։
ՀՀ առաջին նախագահ Լևոն Տեր– Պետրոսյանը 9/19 ընտրատեղամասում մասնակցեց Ազգային ժողովի ընտրության քվեարկությանը։ «Քվեարկեցի հանուն խաղաղության»,– լրագրողների հետ զրույցում ասաց նա։
Հանրահայտ System of a Down ռոք խմբի անդամ Սերժ Թանկյանը ֆեյսբուքան իր էջում նշել է, որ շատ է հպարտանում ընտրություններին մասնակցող իր հայրենակիցներով:
«Ամենակարևորն այն է, որ մարդիկ զգոն են ու հավատում են իրենց ուժերին»,- եզրափակել է նա:
Թանկյանը հավելել է, որ Հայաստանը դեռևս շատ աշխատանք ունի անելու՝ հատկապես տնտեսության ոլորտում:
ՀՀ 3–րդ նախագահ Սերժ Սարգսյանը կնոջ` Ռիտա Սարգսյանի ուղեկցությամբ այցելեց Ձորաղբյուրի 129/45 տեղամաս` իր քաղաքացիական պարտքը կատարելու։
Ռիտա Սարգսյանին ընտրատեղամասի մոտ ծաղիկներ նվիրեցին։ Սերժ Սարգսյանն այս անգամ ևս մատնահետք հանձնելու հետ կապված խնդիրներ ունեցավ։
Սարգսյան ամուսինները քվեարկեցին ԱԺ արտահերթ խորհրդարանական ընտրություններին և արագ հեռացան` չպատասխանելով լրագրողների հարցերին։
ՀՀ Ազգային ժողովի նախագահ Արա Բաբլոյանը դեկտեմբերի 9-ի ՀՀ ԱԺ արտահերթ ընտրություններին քվեարկեց հանուն Հայաստանի և Արցախի անվտանգության: Նա Ազգային ժողովի ընտրության քվեարկությանը մասնակցեց թիվ 4/53 ընտրատարածքում:
«Ես ընտրեցի նաև հանուն մեր ժողովրդի բարեկեցության»,- լրագրողներին ասաց Բաբլոյանը:
Նա խորհրդարան անցնող ուժերին մաղթեց պահպանել այն արժեքները, ինչի համար իրենք մինչ այսօր պայքարել են։
Միշտ եմ մտահոգ, քանի որ մտածող մարդը չի կարող մտահոգ չլինել։ Իր քաղաքացիական պարտքը կատարելուց հետո News.am-ին ասել է ՀՀԿ փոխնախագահ Արմեն Աշոտյանը։
«Ընտրության եմ եկել աշխատանքային տրամադրությամբ, միաժամանակ մտահոգ ու լավատես։ Այսօր ընտրելու եմ հանուն մեր երեխաների ապագայի, հանուն ավելի բաց ու ժողովրդավար, ազգային, քրիստոնյա եւ ապահով Հայաստանի։ Նաև ընտրելու եմ հանուն այն Հայաստանի, որը նույնիսկ ամենաէյֆորիկ վիճակում չի կորցրել մտածելու կարողությունը»,- ասել է Աշոտյանը։
ՀՀ վարչապետի պաշտոնակատար, «Իմ քայլը» դաշինքի համամասնական ցուցակը գլխավորող Նիկոլ Փաշինյանը, քվեարկությունից հետո լրագրողների հետ զրույցում ասաց, որ իր տեղեկություններով ընտրության ընթացքի հետ կապված հարցեր չկան։ Իսկ վարչական ռեսուրսի կիրառման մասին հայտարարություններին այսպես արձագանքեց. «Եթե վարչական ռեսուրսի կիրառման փաստեր պարզվեն, կիրառողները կպատժվեն»։
Փաշինյանի խոսքով` ընտրությունների արդյունքը ցույց կտա, թե հետո ինչ է լինելու`կախված նրանից, թե ինչ կորոշի ՀՀ ժողովուրդը։
«Ժողովրդավարության իմաստն այն է, որ հենց ժողովուրդն է որոշում ով է լինելու իշխանության, ով է լինելու խորհրդարանում և ով` ոչ »,– ասաց նա, բայց և հավելեց` եթե հարցումներն իրականում արտահայտում են ժողովրդի տրամադրվածությունը` ընտրություններից հետո իշխանական կոալիցիա չի կազմվի։
«Լուսավոր Հայաստանի» համամասնական ցուցակը գլխավորող Էդմոն Մարուքյանն իր ընտրությունը կատարել է Հայստանի այն ներկայի համար, որը սկսվել է և այն ապագայի, որի մասին խոսել է քարոզարշավի ընթացքում։ Այս մասին թեկնածուն հայտնեց լրագրողներին` իր ընտրությունը կատարելուց հետո։
«Այսօր հնի և նորի կռվի ավարտն է։ Ես մեր քաղաքացիներին կոչ եմ անում շատ ակտիվ գնալ և իրենց քաղաքացիական պարտքը կարատել։ Հանկարծ չկարծեք, որ ամեն ինչ ավարտված է։ Այսօր է ամեն ինչ ավարտվելու»,– ասաց նա։
Մարուքյանը հայտնեց նաև, որ «Լուսավոր Հայաստանի» ներկայցուցիչները ընտրական տեղամասերից խախտումների վերաբերյալ մի շարք մտահոգող տեղեկություններ են ներկայացրել, որոնք իրենք փոխանցել են ոստիկանությանը։
Ժամանակը քիչ էր, ասելիքը շատ։ Այսօր, ընտրական տեղամասում, լրագրողների հետ զրույցում, մեկնաբանելով նախընտրական քարոզարշավի ընթացքը, ասաց ՀՅԴ համամասնական ցուցակը գլխավորող Արմեն Ռուստամյանը։
Հարցին, թե հանուն ինչի է իր ընտրությունն իրականացրել, Ռուսատամյանը պատասխանեց. «Մեծ հույսով ու հավատով, հանուն մեր ժողովրդի ակնկալիքների, որ ժողովուրդը չհիասթափվի ու ունենա այն Հայաստանը, որն ուզում է ունենալ»։
Հայաստանի զարգացման, երկիրը կառավարելու, աշխատատեղեր ստեղծելու, ներքին և արտաքին սպառնալիքները հաղթահարելու օգտին է քվեարկել ՕԵԿ ղեկավար, կուսակցության համամասնական ցուցակը գլխավորող Արթուր Բաղդասարյանը:
«Քվեարկեցի Հայաստանի զարգացման օգտին, նորարարական խելացի ծրագրերով երկիրը կառավարելու օգտին, նոր աշխատատեղերի ստեղծման, այլ ոչ թե կրճատման օգտին, Հայաստանի առջև ծառացած բյուր ու բազում ներքին ու արտաքին սպառնալիքները նորարարական մոտեցումներով կառավարելու ու հանգուցալուծելու օգտին»,– ասաց նա։
Բաղդասարյանը հայտնեց, որ ժամը 10.00-ի դրությամբ իրենք ընտրախախտումների վերաբերյալ ահազանգեր չեն ստացել, և հույս հայտնեց, որ ընտրությունները կանցնեն առանց միջադեպերի, ՕԵԿ-ն էլ կլինի ապագա խորհրդարանում:
«Ոչ թե ազատ ընտրություններ են, այլ ուղղակի ահագին մեծ փոփոխություն կա բոլոր առումներով»։ Այս մասին, իր քաղաքացիական պարտքը կատարելուց հետո, լրագրողներին ասաց ԲՀԿ համամասնական ցուցակը գլխավորող Գագիկ Ծառուկյանը` պատասխանելով։
Անդրադառնալով ընտրության արդյունքների կանխատեսումների վերաբերյալ հարցին` ԲՀԿ առաջնորդն ասաց, որ արդյունքների հետ համամիտ կլինի ընտրություններից հետո, որ համապատասխան տվյալները լինեն։ «Այսօր մարդիկ քնած տեղը չեն կարա որոշումներ կայացնեն»,–նշեց նա։
ԲՀԿ առաջնորդը հիշեցրեց` արել է, անում է, անելու է ժողովրդի համար, բայց ինչքան ժողովուրդը կվստահի, այդքան էլ ձայն կտա։ «Ինչքան շատ լինի, այնքան մեր պատասխանատվությունը մեծ կլինի»,–ընդգծեց նա։
Սա լինելու է ՀՀ պատմության մեջ ամենաարդար ընտրությունը։ Այսօր Երևանի 4/35 ընտրատեղամասում իր քաղաքացիական պարտքը կատարելուց հետո նման կարծիք հայտնեց ՀՀ ԱԱԾ պետ Արթուր Վանեցյանը։
Նա հայտարարեց, որ ընտրություն է կատարել` հանուն ազատ Հայաստանի, որտեղ քաղաքացին է լինելու որոշողը։
Ներկայացնելով ընտրությունների ընթացքում օպերատիվ իրավիճակը` Վանեցյանը հայտնեց, որ այն վերահսկվում է, արտառոց դեպքեր չեն եղել։ «Հոսանքազրկված են եղել մի քանի ընտրատեղամասեր, բայց շատ արագ վերականգնվել է»,– ասաց նա։
Իսկ ընտրակաշառքի մասին ահազանգեր ԱԱԾ–ն չի ստացել։
ՀՀ նախագահը մասնակցեց Ազգային ժողովի ընտրության քվեարկությանը և նշեց, որ այս ընտրությունը տոն է յուրաքանչյուրի համար։ Արմեն Սարգսյանը հույս ունի, որ այս ընտրությունը ազատ և արդար կլինի։
«Ազգային վերածնունդ» կուսակցությանը ցուցակը գլխավորող Լուսինե Հարոյանն իր ընտրությունը կատարեց «հանուն նոր Հայաստանի»։ Այս մասին այսօր տեղամասում ընտրությունը կատարելուց հետո լրագրողներին հայտնեց թեկնածուն։
«Հանուն այն գործի, որ սկսեցինք ապրիլ–մայիսին ու հանուն բոլորի պայծառ ապագայի»,– ասաց նա։
«Սասնա ծռեր» կուսակցության համամասնական ցուցակը գլխավորող Վարուժան Ավետիսյանը քվեարկեց հանուն ինքնիշխան, հզոր և բոլոր հայերի հայրենիք դարձող Հայաստանի։
«Այդ նախադրյալները կան այսօր, և մենք բոլորս միասին աշխատենք դրանց իրականացման ուղղությամբ։ Ես վստահում եմ մեր ժողովրդին, լրացուցիչ մեկնաբանություններ չեմ ուզում տալ` լռության կարգը չխախտելու համար»,– ասաց նա։
ՀՀԿ համամասնական ցուցակը գլխավորող նախկին ՊՆ Վիգեն Սարգսյանը քվեարկել է հանուն այն Հայաստանի, որտեղ որևէ մեկի մտքով չի անցի հասարակությանը բաժանել սևերի ու սպիտակների, որովհետև դա ուղիղ ճանապարհ է դեպի ներքին թշնամու ձևավորում։
«Իսկ պաշարված բերդում ներքին թշնամին ամենավատ բանն է։ Մեր մարտահրավերները շատ մեծ են, մեր ունեցած պաշարներն` այդ մարտահրավերներից անհամեմատ փոքր»,–ասաց նա։
Սարգսյանը հույս հայտնեց, որ չեն լինի քայլեր, որոնք կթուլացնեն Հայաստանի դիրքը տարածաշրջանում։
Դիտարկմանը, որ ՀՀԿ–ն ընտրության է գնում առանց վարչական լծակների, Վիգեն Սարգսյանն ասաց, որ ՀՀԿ–ն վարչական լծակի վրա երբևէ հույս չի դրել։
ՀՀԿ համամասնական ցուցակը գլխավորող նախկին ՊՆ Վիգեն Սարգսյանը ընտրատեղամաս էր եկել կնոջ և 3 դուստրերի հետ։ Քաղաքացիական պարտքը կատարելուց հետո, լրագրողների հետ զրույցում, նա նախ կատակեց` լրագրողներին հարցնելով` իսկ դուք արդեն ընտրե՞լ եք, ապա ասաց` հույս ունի, որ հանրությունն ակտիվ կմասնակցի ընտրությանը։
«Դա շատ կարևոր է, երկրի համար վճռորոշ պահերին պետք է մեծ համախմբվածություն ցուցաբերել։ Ամենավերջին բանը, որ այսօր կարելի է անել` տանը նստելն է։ Հույս ունեմ, որ օրվա վերջին մենք կունենանք ավելի համախմբված հասարակություն»։,–ասաց Վիգեն Սարգսյանը։
Առաջին ընտրողներն արդեն կատարել են իրենց քաղաքացիական պարտքը։ Այս մասին քիչ առաջ լրագրողների հետ հանդիպմանը հայտարարեց ԿԸՀ նախագահ Տիգրան Մուկուչյանը։
Նա հայտնեց, որ 465 քաղաքացի նոյեմբերի 30-ից դեկտեմբերի 2 –ն ընկած ժամանակահատվածում էլէկտրոնային կարգով արդեն իրականացրել են իրենց ընտրությունը։ Դրանց արդյունքները, սակայն, կբացվեն ու կամփոփվեն այսօր 20։00-ից հետո։
Մուկուչյանը հայտնեց, որ հանրապետության 2010 տեղամասերից 5–ում առաջացել են տեխնիկական խնդիրներ, որոնք տեղում լուծվել են համապատասխան մասնագետների կողմից։
ԿԸՀ նախագահի տվյալներով` ընտրությունները դիտարկում է 505 միջազգային և 17 813 տեղական դիտորդներ։
Ընտրւթյունները լուսաբանելու համար հավատարմագրվել է 70 ԶԼՄ–ի 1700 հայաստանցի և 80 արտասահմանցի լրագրող։
ՀՀ ոստիկանապետ Վալերիյ Օսիպյանն արդեն կատարեց իր քաղաքացիական պարտքը Երևանի թիվ 10/54 ընտրատեղամասում։
Օսիպյանը հայտնել է, որ ընտրություն է կատարել «հանուն լավ Հայաստանի»։
Լրագրողների հետ զրույցում, անդրադառնալով ընտրական խախտումների կանխարգելման ուղղությամբ ոստիկանության ձեռնարկած միջոցներին, ոստիկանապետը նշեց. «Օրենքով նախատեսված կանխարգելիչ աշխատանքները լավ են իրականացվել։ Նախորդ ըտրությունների հետ համեմատելով ասեմ, որ աննախադեպ քարոզարշավ էր։ Գրեթե չենք ունեցել նախընտրական քարոզարշավի խախտումներ»։
Հաշվի առնելով ոստիկանության ձեռնարկած միջոցառումները`Օսիպյանը հույս հայտնեց, որ այսօր պետք է որ խնդիրներ չլինեն։
Հայաստանի ամբողջ տարածքը բաժանված է 13 ընտրատարածքի, որից 4-ը՝ Երևանում, 9-ը՝ մարզերում:
Ոստիկանության հրապարակած ընտրողների վերջնական ցուցակների համաձայն` ՀՀ-ում գրանցված է ընտրելու իրավունք ունեցող 2 մլն 573 հազար 779 քաղաքացի։
Ընտրատեղամասերը կգործեն 12 ժամ՝ մինչև 20:00-ն:
ԱԺ արտահերթ ընտրության մասնակցում են 11 քաղաքական ուժ` 2 դաշինք և 9 կուսակցություն։
