ԵՐԵՎԱՆ, 7 դեկտեմբերի – Sputnik. ՀՀ վարչապետի պաշտոնակատար Նիկոլ Փաշինյանը և Ադրբեջանի նախագահ Իլհամ Ալիևը հանդիպել են Սանկտ Պետերբուրգում, ԱՊՀ երկրների ղեկավարների ոչ ֆորմալ հանդիման կուլուարներում։ Այս լուրը Sputnik Արմենիայի հետ զրույցում հաստատեց Նիկոլ Փաշինյանի մամուլի խոսնակ Արման Եղոյանը։
«Եղել է ոչ պաշտոնական շփում 2 երկրների ղեկավարների միջև։ Քննարկվել է Ադրբեջանում կալանավորված ՀՀ քաղաքացիների և Հայաստանում կալանավորված Ադրբեջանի քաղաքացիների փոխանակման հարցը»,–ասաց Եղոյանը։
Նրա խոսքով` 2 երկրների ղեկավարները մտքեր են փոխանակել ԼՂ հակամարտության բանակցային գործընթացի պատմության վերաբերյալ։
«Խնդրի ապագա կարգավորման վերաբերյալ որևէ բովանդակային քննարկում ևս չի եղել»,–հավելեց Եղոյանը
Փաշինյան–Ալիև հետագա հանդիպումների մասին ևս որևէ պայմանավորվածություն ձեռք չի բերվել։
ՀՀ վարչապետի պաշտոնակատարն էլ այսօր, լրագրողների հետ զրույցում ասել է, որ փոխանակման հարցով իրենք առաջարկել են բոլորը բոլորի դիմաց սկզբունքը, բայց մենք այդտեղ խնդիր ունենք: Արցախի իշխանությունների հետ էլ պետք է քննարկում լինի:
Հիշեցնենք` ԱՊՀ երկրների ղեկավարների ոչ ֆորմալ հանդիպումը կայացել է երեկ` դեկտեմբերի 6–ին, Սանկտ Պետերբուրգում։
