ԵՐԵՎԱՆ, 1 դեկտեմբերի — Sputnik. Ղարաբաղյան հարցի վերջնական լուծումը ենթադրում է այսպես կոչված անվտանգության գոտու տարածքների մասնակի կամ ամբողջական փոխանցում Ադրբեջանին և Ղարաբաղի ինքնորոշման իրավունքի լիակատար իրականացում։ Այս մասին Լազարյան ակումբի նիստի ժամանակ ասաց Պետդումայի ԱՊՀ հարցերով եվրասիական ինտեգրման և հայրենակիցների հետ կապերի հանձնաժողովի առաջին փոխնախագահ Կոնստանտին Զատուլինը։
«Սա այն է, ինչ կա ցանկացած մոդելի մակերեսին։ Բայց հողի հանձնումը պետք է անպայման ուղեկցվի Լեռնային Ղարաբաղի ինքնորոշման իրավունքի ամբողջական իրականացմամբ։ Ստեղծված պայմաններում դժվար թե իրական է խոսել հող հանձնելու մասին` ապագայում ինքնորոշման մասին քննարկման դիմաց», - ասաց Զատուլինը։
Նա նշեց, որ 2016 թվականին հրադադարի ռեժիմի խախտման մեղավորն ադրբեջանական կողմն է։ Զատուլինի խոսքով՝ Ռուսաստանը չի կարող աչք փակել ղարաբաղյան խնդրի վրա։
Մոսկվայում հիմա շատերը հաճախ ասում են, որ Ռուսաստանը չպետք է միջամտի Հայաստանի կամ Ադրբեջանի հետ հարաբերությունները չփչացնելու համար, բայց Զատուլինը վստահ է, որ այդ մարտավարությունն իրեն չի արդարացնում։
«Եթե ռումբն ավազի մեջ թաղենք կամ սեփական ստվերից վախենանք, ապա Ռուսաստանին անպայման այլ տեսակետներ կպարտադրվեն։ Այդ պատճառով Ռուսաստանն ինքը պետք է խոսի խնդրի մասին ու նպաստի դրա լուծմանը», - նշեց Զատուլինը։
Հիշեցնենք ՝ երեկ Երևանում կայացավ հայ-ռուսական Լազարյան ակումբի առաջին նիստը։ Ակումբի նախաձեռնողներից է Պետդումայի ԱՊՀ հարցերով եվրասիական ինտեգրման և հայրենակիցների հետ կապերի հանձնաժողովի առաջին փոխնախագահ Կոնստանտին Զատուլինը։
