ԵՐԵՎԱՆ, 1 դեկտեմբերի — Sputnik. Հայաստան մատակարարված ռուսական զենքն ու ռազմական տեխնիկան չեզոքացրել են Ադրբեջանի քանակական ու որակական գերազանցությունը։ Այսօր Երևանում Լազարյան ակումբի նիստի ընթացքում այս մասին ասաց ռազմական փորձագետ Վլադիմիր Եվսեևը։
Փորձագետը մասնավորապես նշեց «Իսկանդեր» հրթիռային համակարգերը, որոնք պատասխան հզոր հարված հասցնելու հնարավորություն են տալիս Հայաստանին։ «Իսկանդերներից» բացի, Ռուսաստանը նաև համազարկային կրակի ռեակտիվ համակարգեր է մատակարարել։
Մասնագետը նշեց, որ Ադրբեջանը հիմա ակտիվորեն փնտրում է այնպիսի ռազմական տեխնիկայի մատակարարների, որն իր բնութագրով կարող է համարժեք լինել «Իսկանդերին»։ Այդ նպատակով է Բելառուսից գնել «Պոլոնեզ» համազարկային կրակի ռեակտիվ համակարգերը։ Սակայն, փորձագետի կարծիքով, դրանք չեն կարող «Իսկանդերների» համար «հակաթույն» լինել։
Ի պատասխան Ադրբեջանի գնած իսրայելական ԱԹՍ-ների, Հայաստանը ռադիոէլեկտրոնային միջոցներ է գնել Ռուսաստանից։
Եվսեևի խոսքով՝ եթե Բաքվին կրկին հաջողվի Երևանի նկատմամբ քանակական գերազանցության հասնել, ապա Ադրբեջանը նորից կարող է ուժային ակցիաների դիմել։ Այսօրվա իրավիճակում շփման գծի ցանկացած փոփոխություն չափազանց վտանգավոր է Հայաստանի ու Ղարաբաղի համար։ Այսինքն՝ Ղարաբաղի շուրջ «անվտանգության գոտին» ապահով պաշտպանություն է չճանաչված հանրապետության տարածքի համար Այդ տարածքի կորուստը կդդրդի Ադրբեջանին, որ Ղարաբաղի տարածքը գրավելու փորձ անի։
Հիշեցնելով Ռուսաստանի ու Հայաստանի ստորագրած 100– միլիոնանոց վարկային համաձայնագրի մասին, որի շրջանակում պետք է նոր զենք մատաակրարվի, Եվսեևը կոչ արեց երկու երկրների ղեկավարությանը հնարավորինս հստակեցնել մատակարարվող սպառազինության փաստաթղթավորումն ու արագացնել մատակարարումները։
