Բոզոյանը վստահ է, որ սկզբունքային իմաստով քարոզարշավի բնույթն առաջին օրից մինչև հիմա չի փոխվում, և քաղաքական ուժերը հիմնականում նույն ոճով են գործում։
«ՀՀԿ–ն 12 օրը բաժանել է ոլորտների և փորձում է Փաշինյանի ու իր տարբերությունները նշել։ Փաշինյանը, բնականաբար, հակադարձում է ՀՀԿ–ին։ Եվ ստացվում է, որ այս քարոզարշավի
հիմնական առանցքն այդ երկու ուժերի հակամարտությունն է»,– ասում է փորձագետը։
Նրա խոսքով` քարոզարշավի ընթացքում փոխադարձ մեղադրանքներ են հնչում` գաղափարական պայքարի փոխարեն։
«Փաշինյանը փաստացի իր նախընտրական արշավը կառուցում է ՀՀԿ–ին քարկոծելով, իսկ ՀՀԿ–ն ցույց է տալիս Փաշինյանի խոսքի և գործի տարբերությունը»,– ասում է նա։
Ըստ Բոզոյանի` այս փուլում, երբ կա էյֆորիայի որոշակի մթնոլորտ, քաղաքական ուժերի համար շատ դժվար է որևէ թեզով հանդես գալ։ Նրա խոսքով` այս քարոզարշավը նախորդներից տարբերվում է նրանով, որ հիմա փողի փոխարեն մեծացել է խոսքի կարևորությունը։
