ԵՐԵՎԱՆ, 29 նոյեմբերի — Sputnik. Դատարանը մինչև 2019 թվականի փետրվարի 6-ը երկարաձգել է ձեռնարկատեր, «Հ2» հեռուստաալիքի սեփականատեր Սամվել Մայրապետյանի կալանքը, այսօր լրագրողներին հայտնել է գործարարի փաստաբան Կարեն Բատիկյանը։
Մայրապետյանը Հ2 հեռուստաընկերության և «Տոյոտա Երևան» ընկերության սեփականատերն է, ինչպես նաև Երևանի կենտրոնում զբաղվում է էլիտար անշարժ գույքի շինարարությամբ։ Հայկական ԶԼՄ–ների տեղեկության համաձայն, նա մտերիմ հարաբերությունների մեջ է ՀՀ երկրորդ նախագահ Ռոբերտ Քոչարյանի հետ։ Մայրապետյանին կալանավորել են հոկտեմբերի սկզբին՝ մեղադրելով կաշառքի օժանդակության մեջ։
«Դատարանն այսօր մերժեց Մայրապետյանին գրավի դիմաց ազատելու մասին մեր միջնորդությունը և բավարարեց մինչև փետրվարի 6-ը կալանքը երկարաձգելու մասին քննիչի պահանջը։ Այդ որոշումը չհիմնավորված և անօրինական եմ համարում», – ասաց Բատիկյանը։ Նրա խոսքով` քննությունը կալանքի երկարաձգման համար հիմքեր չի ներկայացրել։
«Մտադիր եմ բողոք ներկայացնել վերաքննիչ դատարան», – ասաց փաստաբանը։
Ավելի վաղ մի շարք հայկական ԶԼՄ–ների ղեկավարներ նամակով դիմել էին իշխանություններին՝ կոչ անելով ազատել Մայրապետյանին։ Նրանց կարծիքով, նա «մի մարդու ցուցմունքների հիման վրա անհիմն կալանքի տակ է գտնվում 10.5 տարի առաջ տեղի ունեցած պատմության պատճառով»։
Նամակը ստորագրած մարդիկ հայտարարել էին, որ անկախ Հայաստանի պատմության մեջ առաջին անգամ համապետական հեռուստաալիքի տնօրեն է կալանավորվել։ Նրանք ընդգծել են, որ ճանաչում են Մայրապետյանին երկար տարիներ, համոզվել են նրա բարեխղճության, օրինապաշտության, սկզբունքայնության, և համոզմունք հայտնել, որ խափանման միջոցը փոխելու դեպքում, նա չի թաքնվի և չի խոչընդոտի քննությանը։
